ایک دفعہ کا ذکر ہے کہ ایک ظالم بادشاہ پورے جاہ و جلال کے ساتھ دربار سجائے تخت پہ سایہ فگن تھا ۔۔۔۔کہ کسی وزیر نے محاورتا” کہہ دیا کہ
” یہاں تو الٹی گنگا بہہ رہی ہے”
الٹی گنگا کا نام سنتے ہی بادشاہ سلامت اشتیاق و جلال سے اٹھ کھڑا ہوا اور شاہی چغہ لہراتے ہوئے وزیر موصوف کو حکم دیا کہ ۔۔۔۔پتہ کرو کہ الٹی گنگا کہاں واقع ہے؟
پورا دربار خوف سے ساکت تھا۔۔۔۔کسی کو کیا معلوم کہ الٹی گنگا کہاں بہتی ہے؟؟؟
تمام وزرا کی یہ خاموشی دیکھ کر شہنشاہ مزید طیش میں آ گیا ۔۔۔۔
اور وزیر موصوف کو حکم دیا دو ہفتوں کے اندر اندر الٹی گنگا دریافت کر کے لے لاو ورنہ تمہاری گردن مار دی جائے گی۔۔۔۔۔۔
چنانچہ وزیر موصوف دربار سے فرشی سلام بھرتا ہوا وہاں سے بھاگ کھڑا ہوا۔۔۔۔
حواس باختہ وزیر ایک ہفتے تک گھوڑا دوڑاتا رہا مگر اسے کوئی ندی، نالا یا دریا ایسا نہ ملا جو مشرق کی طرف الٹا بہہ رہا ہو۔۔۔۔ہر ندی نالا غربی سمت رواں دواں تھا۔۔۔۔
آخر کار کسی بھلے مانس نے بتایا کہ گنگا تو ہندوستان میں واقع ہے۔۔۔۔
چنانچہ وزیر ہندوستان کی طرف روانہ ہو گیا اور منزلوں پہ منزلیں مارتا ہوا دریائے گنگا جا پہنچا۔۔۔۔۔
وہاں جاکر اسے شدید مایوسی ہوئی کیونکہ گنگا بھی اپنی ٹھیک سمت یعنی مغرب کی طرف رواں دواں تھی۔۔۔۔۔
چنانچہ وہ کسی امید کے تابع گنگا کے ساحل کے ساتھ ساتھ گھوڑا دوڑاتا رہا کہ شاید کسی جگہ ۔۔۔گنگا الٹی سمت بہہ رہی ہو۔۔۔۔مگر اسے کسی جگہ بھی الٹی سمت بہاو نہ ملا۔۔۔
آخر تھک ہار کہ گنگا کے کنارے ایک پیپل کے درخت کے ساتھ ٹیک لگا کر سو گیا۔۔۔۔
کہتے ہیں کہ نیند تو سولی پہ بھی آ جاتی ہے۔۔۔۔چنانچہ جلد ہی وزیر بے چارہ خوابوں کی وادی میں کھو گیا۔۔۔۔۔
خواب میں کیا دیکھتا ہے کہ ایک نورانی شکل والے بزرگ تشریف لائے جن کے ماتھے پر مہراب جلوہ آفروز تھا اور ایک چار پہیوں والی ریڑھی نما گاڑی پہ سایہ فگن تھے اور گاڑی معجزاتی طور خود بخود چل رہی تھی۔۔۔۔
چنانچہ وزیر خواب میں اس کے پاوں سے لپٹ گیا اور آہ فریاد کی۔۔۔
کہ میرا بادشاہ بہت ظالم ہے وہ مجھے اور میرے بیوی بچوں کو قتل کرا دے گا۔۔۔۔مجھے صرف یہ بتا دیں کہ الٹی گنگا کہاں بہہ رہی ہے۔۔۔۔۔
بزرگ کے چہرے مبارک پہ کئی رنگ آئے اور کئ گزر گئے آخرکار ایک مبہم تبسم ابھر آیا اور جنوب مغرب کی سمت اپنی شہادت والی انگلی سے اشارہ کرتے ہوئے کسی بدیسی زبان میں بارعب انداز میں فرمایا کہ۔۔۔۔
"اوچ ونج۔۔۔۔اوچ ۔۔۔۔۔۔(اوچشریف جاو)
چنانچہ وزیر نیند سے ہڑبڑا کر اٹھ بیٹھا مگر اب بھی بزرگ کے وہ الفاظ کسی ارتعاش کی طرح زہن میں گونج رہے تھے۔۔۔۔اوچ ونج۔۔۔۔اوچ ونج۔۔۔۔۔۔اوچ ونج۔۔۔۔۔۔
چنانچہ اس نے فورا گھوڑے کو ایڑ لگائی اور بزرگ کی بتائی ہوئی سمت روانہ ہو گیا۔۔۔۔۔۔۔
کئ دنوں کی مسافت کے بعد ایک نئی دنیا میں پہنچ چکا تھا ۔۔۔۔ایک بازار میں پہنچا دو تین بندوں سے جگہ کا نام پوچھنے کی کوشیش کی مگر سبھی موبائل پہ لگے ہوئے تھے کسی نے جواب نہ دیا۔۔۔آخر ایک فقیر کو ایک اشرفی تھمائی تو اس نے بتایا یہ نوابوں کا شہر بہاول پور ہے اوچ ستر کلومیٹر آگے ہے۔۔۔۔۔
دو گھنٹے گھوڑا دوڑانے کے بعد ایک اور شہر آیا وہاں ٹرین اسٹیشن موجود تھا پوچھنا کیا۔۔۔ایں شہر اوچ است؟ یہ اوچ شہر ہے؟ جواب ملا ۔۔۔۔ہنوز اوچ دور است۔۔۔۔۔۔
یہ ڈیرہ نواب صاحب ہے۔۔۔۔قریب ہی ایک غریبوں کی بستی تھی
وزیر نے ایک انگریزی کیکر کے ساتھ گھوڑا باندھا ۔۔۔۔۔اتنے میں ایک تگڑی موچھوں والا کندھے پہ رومال ڈالے ایک ببر شیر جوان موچھوں کو تاو دیتا ہوا ۔۔۔۔آن پہنچا اور بڑے پرتپاک انداز میں ملا اور اپنی کٹیا میں لے گیا۔۔۔۔وہاں پر ۔۔۔۔۔(حورالمستورات فی لخیام) کی عملی تصویر موجود تھی۔۔۔۔
چنانچہ مشروب حسن بن صباح پیش کیا گیا۔
وزیر کو جب ہوش آیا تو شاہی چغہ ایک طرف پڑا تھا ۔۔۔جیبوں کو ٹٹولا تو بے اختیار منہ سے یہ شعر نکلا۔۔۔۔۔
اجڑ گیا وہ باغ ۔۔۔۔جس کے لاکھوں مالی تھے۔۔۔۔
وزیر جب رخصت ہوا تو دونوں جیب خالی تھے۔۔۔۔
المختصر۔۔۔۔وزیر مرتا کیا نہ کرتا اوچشریف پہنچ گیا۔۔۔شہر میں داخل ہوتے ہی پورے اوچ کے آوارہ کتوں نے گھوڑے اور وزیر کو گھیر لیا اور شایان شان استقبال کیا۔۔۔۔
اوچشریف کی پاک گلیاں پسلتے پھلانگتے وزیر موصوف ۔۔۔بالے نائی۔۔۔کی دکان پہ پہنچا۔۔۔گھوڑا نزدیکی بجلی کے کھنمبے کے ساتھ باندھا اور شیو کروانے کی غرض سے بالے نائی کے سامنے کرسی پر براجمان ہو گیا۔۔۔۔
شیو کے دوران وزیر نے ساری رام کہانی بالے نائی کو سنائی۔۔۔۔
بالا نائی کہانی سنتا رہا اور روتا رہا۔۔۔۔۔۔اتنے میں بالے نائی کے شاگرد جگنو نے ڈیک پہ جاری گانے کی آواز اونچی کی۔۔۔۔۔۔۔۔
جو ہم نے داستاں اپنی سنائی۔۔۔۔آپ کیوں روئے۔۔۔۔۔۔۔
تھوڑی دیر بعد بالے نائی نے ایک سرد آہ بھری اور وہ تاریخی الفاظ کہے جو اوچ کی تاریخ میں سنہری حروف سے لکھے جائیں گے کہ۔۔۔۔۔۔۔۔۔۔
او کاکے۔۔۔یہ اوچشریف ہے یہاں ہر گلی میں الٹی گنگا بہہ رہی ہے۔۔۔۔آو خود ملاحظہ فرما لو۔۔۔۔۔۔
وزیر بالے نئی کے ساتھ باہر آیا تو دیکھا کھمبے کے ساتھ بندھا وزیر کا گھوڑا مر چکا ہے ۔۔۔شائد بجلی کے میٹر کی سرعت رفتاری دیکھ کر شرم سے مر گیا ہو گا۔۔۔۔۔
بالا نائی وزیر کو لے کر جیسے ہی ٹینکی چوک سے ہوتا ہوا بورڈنگ موڑ پہنچا سامنے۔۔۔۔الٹی گنگا پوری حشر سامانیوں کے ساتھ رواں دواں تھی۔۔۔۔۔
اس کے بعد پورے شہر کی سیوریج کو غربی سمت ڈھلوان کے بجائے۔۔۔الٹی گنگا بہا کر شرقی سمت واقع عباسیہ لنک کینال میں گندہ پانی ڈالنے کی ناکام کوشیش کے ضمن میں ایجاد فرمایا جانے والا گندہ کھوہ ملاحظہ کیا گیا۔۔۔۔۔جسے دیکھ کر۔۔۔
وزیر نے خوشی سے کلکاری ماری اور خالی جیب بغیر گھوڑے کے اپنے بادشاہ کو خبر دینے بھاگ کھڑا ہوا
