وزیراعظم کی مکہ مکرمہ پر بزدلانہ ڈرون حملے کی کوشش کی شدید مذمت

وزیراعظم شہباز شریف نے مکہ مکرمہ کے مقدس مقام کے خلاف ڈرون حملے کی کوشش کی شدید ترین الفاظ میں مذمت کی ہے-

وزیراعظم شہباز شریف نے ایکس پر جاری بیان میں کہا کہ مکہ مکرمہ کے مقدس مقام کے خلاف بزدلانہ اور گھناؤنے ڈرون حملے کی کو شش کی وہ سخت ترین الفاظ میں مذمت کرتے ہیں۔ انہوں نے کہا کہ پاکستانی عوام اس اشتعال انگیز اقدام پر غم زدہ اور مضطرب ہیں، جبکہ ا س قابل مذمت اور ناقابل معافی کارروائی پر محسوس کیے جانے والے دکھ اور صدمے کی گہرائی بیان کرنے کے لیے الفاظ ناکافی ہیں۔

وزیراعظم نے سعودی شاہی مسلح افواج کی غیر معمولی چوکسی، بہادری اور پیشہ ورانہ صلاحیت کو خراج تحسین پیش کرتے ہوئے ان کی بروقت اور بہادرانہ کارروائی کو سراہا اورایک بار پھر تمام فریقین پر زور دیا کہ وہ زیادہ سے زیادہ تحمل کا مظاہرہ کریں اور مزید کشیدگی کے دہانے سے پیچھے ہٹیں۔ انہوں نے کہا کہ خطہ پہلے ہی تنازعات کی وجہ سے بہت زیادہ نقصان اٹھا چکا ہے، جبکہ پائیدار امن کے لیے مذاکرات اور سفارت کاری ہی واحد راستہ ہیں۔

https://x.com/CMShehbaz/status/2100098509156540705?s=20

وزیراعظم نے کہا کہ پاکستان سعودی عرب کی خودمختاری اور علاقائی سالمیت کے دفاع کے ساتھ ساتھ حرمین شریفین کے تحفظ اور تقدس کے لیے برادر ملک کے شانہ بشانہ غیر متزلزل طور پر کھڑا ہے، اور یہ ایسا فریضہ ہے جسے ہر پاکستانی اپنے دل کے قریب سمجھتا ہے۔