ایران کے وزیرِ تیل محسن پاک نژاد نے عہدے سے استعفیٰ دے دیا

ایران کے وزیر تیل محسن پاک نژاد نے اپنے عہدے سے استعفیٰ دے دیا۔ غیرملکی خبررساں ادارے کی رپورٹ کے مطابق ایرانی سرکاری میڈیا نے بتایا کہ وزیر تیل محسن پاک نژاد اپنے عہدے سے مستعفی ہوگئے ہیں جبکہ حکومت کی ملکیت نیشنل ایرانی آئل کمپنی کے چیف ایگزیکٹیو حامد بوارد کو ان کی جگہ عبوری وزیر کا چارج دیا گیا ہے۔

ایرانی صدر کے دفتر نے بتایا کہ صدر مسعود پزشکیان نے محسن پاک نژاد کا استعفیٰ قبول کرلیا ہے اور حامد بووارد کو قائم مقام وزیر تیل مقرر کردیا ہے۔

میڈیا رپورٹ کے مطابق مستعفی وزیر نے بتایا کہ تیل کی برآمد سے سرمایے کی آمد جاری ہے اور ان شااللہ یہ سلسلہ جاری رہے گا۔ محسن پاک نژاد نے وزارت سے استعفے کی وجوہات کے بارے میں تفصیلات نہیں بتائیں۔

ایران تیل برآمد کرنے والے ممالک کی تنظیم اوپیک کا رکن ہے اور محسن پاک نژاد اگست 2024 سے اہم شعبے کے وزیر تھے جبکہ ایران پر امریکا اور اسرائیل کی جارحیت کو 7 ماہ کا عرصہ گزر چکا ہے اور آبنائے ہرمز کی بندش اور امریکی ناکہ بندی کے باعث دنیا میں ایندھن کی قیمتوں میں اضافہ ہوگیا ہے۔