ملکی بیوروکریسی میں اختیارات کی جنگ میں "استاد اعظم” گروپ نے "خان اعظم گروپ” کو ہلا کر رکھ دیا ہے

ملکی بیوروکریسی میں اختیارات کی جنگ میں "استاد اعظم” گروپ نے "خان اعظم گروپ” کو ہلا کر رکھ دیا ہے

باغی ٹ وی رپورٹ کے مطابق ملکی بیوروکریسی میں اختیارات کی جنگ میں "استاد اعظم” گروپ نے "خان اعظم گروپ” کو ہلا کر رکھ دیا ہے اور ممکنہ طور پر وزیراعظم اپنے پرنسپل سیکرٹری کو تبدیل کرنے پر بھی غور کر سکتے ہیں۔
مستند ذرائع کے مطابق شریف برادران کے حمایت یافتہ استاد اعظم فواد حسن فواد نے اپنے شاگردوں کے ذریعے بیورو کریسی پر اپنی گرفت مضبوط کرتے ہوئے متعدد اہم پوسٹنگز پر اپنے قریبی بیورو کریٹس تعینات کروانے کے بعد گریڈ 22 میں حالیہ ترقیوں میں بڑی تعداد میں اپنے حامی افسران کو ترقی دلوائی ہے،

جس نے خان اعظم گروپ کے سربراہ اور پرنسپل سیکرٹری ٹو پی ایم اعظم خان کو ہلا کر رکھ دیا ہے۔ ذرائع کے مطابق اب میڈیا ہاؤسز میں صحافیوں اور اینکرز کو پیغامات دیئے جا رہے ہیں کہ وہ اپنے پروگرامز اور خبروں کے ذریعے یہ تاثر دیں کہ اعظم خان کی بیوروکریسی پر گرفت پہلے سے مضبوط ہو گئی ہے اور وہی صرف موجودہ حکومت کے بیانیے اور مشن کو آگے بڑھا سکتے ہیں۔

ذرائع کو یہ بھی کہنا ہے کہ استاد اعظم فواد حسن فواد نے ملکی بیوروکریسی پر شریف برادران کی گرفت مکمل کرنے کے لیئے آخری اور بڑی وکٹ گرانے یعنی پرنسپل سیکرٹری ٹو پی ایم اعظم خان کو ہٹوا کر اپنے شاگرد خاص سیکرٹری اسٹیبلشمنٹ ڈاکٹر اعجاز منیر کو پرنسپل لگوانے کی مہم شروع کر دی ہے. دوسری طرف ساری صورتحال میں وزیراعظم عمران خان کے پاس تین آپشنز ہیں،  ایک یہ کہ اعظم خان کو ہٹا کو ڈاکٹر اعجاز منیر کو پرنسپل سیکرٹری تعینات کر دیں اور ملکی بیوروکریسی کو مکمل طور پر شریف برادران کے پروردہ فواد حسن فواد گروپ کے ہاتھ میں دے دیں، دوسرا یہ کہ دن بدن کمزور ہوتے ہوئے اعظم خان کو ہی سہارا دیں جو فی الحال ملکی بیوروکریسی سے اپنی اور وفاقی حکومت کی خلیج کو کم کرنے میں کامیاب نہیں ہو سکے اور تیسرا یہ کہ دونوں آپشنز کے بجائے خالصتاً میرٹ پر کوئی تیسرا مستند اور تجربے کار پرنسپل سیکرٹری تعینات کر دیں۔ یوں اب بیوروکریسی کی یہ جنگ اپنے عروج پر ہے اور ممکنہ طور پر جلد یہ اپنے انجام کو پہنچ سکتی ہے۔