اوچ شریف:کھمبوں پرجھولتے تاراور میٹرز، شہریوں کیلئے لٹکتی موت،کب کھلے گی واپڈا آنکھ ؟
اوچ شریف(باغی ٹی وی نامہ نگار حبیب خان کی رپورٹ) کھمبوں پرجھولتے تاراور میٹرز، شہریوں کیلئے لٹکتی موت،واپڈا کی کب آنکھ کھلے گی؟
تفصیل کے مطابق اوچ شریف میں شہر بھر میں بجلی کے کھمبوں پر بے ہنگم تاریں اور لٹکتے میٹرز خطرناک صورتحال پیدا کر رہے ہیں، جس کے باعث شہریوں میں تشویش پائی جا رہی ہے۔ واپڈا اہلکاروں کی مبینہ عدم توجہی کے باعث یہ تاریں شہریوں کے لیے موت کا سبب بننے لگی ہیں۔
شہریوں نے شکایت کی ہے کہ بارش یا سپارکنگ کے باعث میٹرز میں آگ لگنے کے واقعات میں اضافہ ہو رہا ہے، جس کی قیمت انہیں چکانی پڑتی ہے۔ ان کا کہنا ہے کہ متعدد بار واپڈا حکام کو صورتحال سے آگاہ کرنے کے باوجود کوئی عملی اقدامات نہیں کیے گئے ہیں۔
شہریوں نے مطالبہ کیا ہے کہ واپڈا حکام فوری طور پر لٹکتے میٹرز اور بے ترتیب تاروں کو درست کریں تاکہ کسی بھی ممکنہ حادثے سے بچا جا سکے۔ ان کا کہنا ہے کہ ہنگامی بنیادوں پر اس مسئلے کا حل تلاش کیا جانا ضروری ہے تاکہ عوام کی زندگیوں کو محفوظ بنایا جا سکے۔
