فیصل آباد میں 150 ایکٹر پر عالمی معیار کا "فرنیچر سٹی” بنایا جائے گا

فیصل آباد (نمائندہ باغی ٹی وی)فرنیچر کی برآمدات میں اضافے اور اس شعبے میں سرمایہ کاروں کو راغب کرنے کے لئے علامہ اقبال انڈسٹریل سٹی میں 150 ایکڑ پر عالمی معیار کا "فرنیچر سٹی” بنایا جائے گا۔یہ بات فیصل آباد انڈسٹریل سٹیٹ ڈویلپمنٹ اینڈ مینجمنٹ کمپنی (فیڈمک) کے چیئرمین میاں کاشف اشفاق نے کہی ہے۔ وہ فیڈمک کے لاہورکیمپ آفس میں فرنیچر کے برآمدکنندگان کے ایک وفد سے ملاقات میں گفتگو کر رہے تھے۔ انہوں نے کہا کہ اس اقدام کا بنیادی مقصد بین الاقوامی سطح پر مسابقت کے لیے چھوٹے اور درمیانے درجے کے تاجروں کی معاونت کرنا ہے۔ انہوں نے کہا کہ خصوصی اقتصادی زونز کے لیے پلانٹ اور مشینری کی ملک میں درآمد پر ایک بار تمام کسٹم ڈیوٹیز اور ٹیکسوں سے چھوٹ دی جائے گی۔میاں کاشف اشفاق نے کہا کہ فیڈمک فرنیچر انڈسٹری کے لیے انتہائی جدید "سنٹر فار ایکسیلنس” بنائے گی جہاں لکڑی کے کاریگروں اور طلبہ کو جدید ٹیکنالوجی کے ذریعے منفرد تربیت فراہم کی جائے گی تاکہ وہ فرنیچر مصنوعات کی تیاری میں بین الاقوامی معیار پر عمل کرسکیں۔انہوں نے کہا کہ فرنیچر سازوں کو ون ونڈو آپریشن کے ذریعے وفاقی اور صوبائی محکموں کے ساتھ معاملات کے حل میں معاونت کے علاوہ انہیں ایک بھرپور کاروباری ڈھانچہ بھی فراہم کیا جائے گا تاکہ اس اہم منصوبے کو سرخ فیتے کی نذر ہونے سے بچایا جائے سکے ۔انواں نے کہا کہ ون ونڈو آپریشن کے آغاز سے فیڈمک کو سرمایہ کاروں کے لیے بھی سہولتی مرکز بنایا جائے گا اورانہیں ایک چھت کے نیچے تمام سہولیات فراہم کی جائیں گی۔ میاں کاشف اشفاق نے کہا کہ وزیر اعظم عمران خان نے تمام متعلقہ محکموں کو دو ٹوک انداز میں ہدایت کی ہے کہ خصوصی اقتصادی زونز میں سرمایہ کاروں کو بہترین سہولتیں فراہم کی جائیں، اس کے نتیجے میں حکومت نے لیبر، انوائرمنٹ اور دوسرے قوانین پر عملدرآمد اور مقامی و صوبائی ٹیکسوں کی وصولی کے لیے اتھارٹی تشکیل دی ہے۔انہوں نے کہا کہ وفاقی حکومت کے محکمے بشمول یوٹیلٹی کمپنیز، فیڈرل بورڈ آف ریونیو اور سیکورٹیز اینڈ ایکسچینج کمیشن اپنی سرگرمیوں کے لیے خصوصی اقتصادی زونز میں اپنے نمائندے تعینات کریں گے۔