محکمہ سپیشل ایجوکیشن فیصل آباد کے زیراہتمام کشمیریوں سے اظہار یکجہتی کیلئے واک

فیصل آباد( )فیصل آباد( )محکمہ سپیشل ایجوکیشن فیصل آباد کے زیراہتمام کشمیری بھائیوں سے اظہار یکجہتی اور بھارتی مظالم کی مذمت کے لئے سیمینار اور واک کا اہتمام کیا گیا جس میں ڈسٹرکٹ ایجوکیشن آفیسر (سپیشل ایجوکیشن)چوہدری عبدالحمید،خصوصی تعلیم کے اداروں کے سربراہان،ٹیچرز،سٹوڈنٹس اور سول سوسائٹی کے افراد نے شرکت کی۔سیمینار گورنمنٹ ہائر سیکنڈری ایجوکیشن برائے متاثرہ سماعت میں منعقد ہوا جس سے خطاب کرتے ہوئے ڈی او سپیشل ایجوکیشن چوہدری عبدالحمید نے کشمیری عوام سے یکجہتی کا اظہار خیال کیا اور کہا کہ وہ آزادی کے حصول میں انشاء اللہ کامیاب ہوں گے جس کے لئے وہ اپنے لہو کا نذرانہ پیش کررہے ہیں۔انہوں نے بھارتی فوج کے ظلم وستم کی پرزور مذمت کرتے ہوئے عالمی برادری سے کہا کہ مقبوضہ کشمیر میں نہتے کشمیریوں پر ظلم و استبداد کا فوری نوٹس لیکر انسانی حقوق کی خلاف ورزیوں کو روکا جائے۔سیمینار سے دیگر مقررین نے بھی خطاب کیا اور کشمیری عوام پر ظلم پر گہرے افسوس کا اظہار کرتے ہوئے کہا کہ پاکستانی قوم بے گناہ کشمیریوں کے ساتھ کھڑی ہے وہ جلد فتح ونصرت حاصل کریں گے۔اس موقع پر کشمیری عوام سے یکجہتی اور بھارتی فوج کی جارحیت کے خلاف مذمتی قرار داد بھی منظور کی گئی۔بعدازاں کشمیری عوام سے یکجہتی کے اظہار کے لئے واک منعقد ہوئی جس کے شرکاء نے کشمیری عوام سے محبت اور بھارتی مظالم کے خلاف نعروں پر مبنی بینرز اٹھا رکھے تھے۔