مظفرگڑھ کی احتجاجی سرکاری استانیوں کو سکول میں قید کردیاگیا

مظفر گڑھ میں ہیڈ مسٹریس کے خلاف احتجاج کرنے والی گورنمنٹ گرلز سکول کی خواتین اساتذہ کو محکمہ تعلیم کے افسران نے سکول میں ہی محبوس کر لیا۔احتجاجی خواتین اساتذہ اور طالبات کے لیے سکول کا گیٹ تالے لگا کر بند کردیاگیا.مظفرگڑھ میں گورنمنٹ گرلز ہائی سکول خورشید آباد کی ہیڈمسٹریس کیخلاف احتجاج کرنے والی خواتین اساتذہ کو محکمہ تعلیم کے افسران نے انکے سکول میں ہی محبوس بنادیا.خواتین اساتذہ کیمطابق وہ سکول کی ہیڈمسٹریس اور محکمہ تعلیم کے افسران کیخلاف سکول کے گیٹ پر احتجاج کرنے جارہی تھیں۔خواتین اساتذہ کے احتجاج سے نمٹنے کے لیے محکمہ تعلیم کے مرد افسران نے گرلز سکول کے گیٹ کو اندر سے ہی تالے لگا دئیے۔سکول کے گیٹ کے اندر احتجاج کرنے والی خواتین اساتذہ کا باغی ٹی وی سے گفتگو کرتے ہوئے کہنا تھا کہ گورنمنٹ گرلز ہائی سکول خورشید آباد کی ہیڈمسٹریس نسرین گل کی جانب سے خواتین اساتذہ کو ہراساں کیا جارہا ہے اور اختیارات کا ناجائز استعمال کرکے خواتین اساتذہ کیساتھ ہتک آمیز سلوک کیاجارہا ہے۔احتجاجی خواتین کا کہنا تھا کہ ہیڈمسٹریس کی جانب سے حاملہ خاتون بشری کو میٹرنٹی رخصت نہ دئیے جانے کے باعث خاتون استانی کا نویں ماہ حمل ضائع بھی ہوگیا ہے.احتجاجی خواتین اساتذہ کیمطابق درخواستوں کے باوجود بھی محکمہ تعلیم کے افسران نے شکایات کا نوٹس نہیں لیا.دوسری جانب سکول میں محبوس احتجاجی اساتذہ سے مذاکرات کے لیے سی ای او ایجوکیشن مسعود ندیم گرلز سکول خورشید آباد پہنچ گئے۔سی ای او ایجوکیشن کا کہنا ہے کہ معاملے کی انکوائری کے بعد ہی خواتین اساتذہ کی شکایات کا ازالہ کیا جائے گا.