کوئٹہ میں ادارہ ثقافت کے زیر اہتمام ” خواتین مشاعرہ“ کا انعقاد

رپورٹ : آغا نیاز مگسی

ادارہ ثقافت بلوچستان کے زیر اہتمام نوری نصیر خان کمپلیکس ہال کوئٹہ میں سینیئر شاعرہ طاہرہ احساس جتک کے زیر صدارت خواتین کی محفل مشاعرہ کا انعقاد کیا گیا جس کے مہمان خصوصی سیکریٹری کلچرل ڈپارٹمنٹ بلوچستان نور محمد جوگیزئی اور ان کی اہلیہ محترہ تھیں جبکہ سینیئر شاعرہ تسنیم صنم اعزای مہمان تھیں نظامت کے فرائض انعم جاوید نے ادا کیے ۔

جن شاعرات نے اپنا کلام اور اشعار پیش کیے ان میں طاہرہ احساس جتک، تسنیم صنم ، جہاں آراء تبسم، غزالہ تبسم ، غزالہ بٹ ، حمیرہ سدوزئی، سکینہ بابر ، آرزو زیارت والہ ، زیب لونی ، زکیہ بہروز ، فاریہ بتول، روما ہاشمی اور انعم جاوید شامل ہیں ۔ طاہرہ احساس نے اردو، بلوچی اور براہوی زبان میں اشعار پیش کیے جبکہ آرزو زیارت والہ نے پشتو شاعری پیش کی غزالہ تبسم نے ترنم میں گیت پیش کیا تسنیم صنم ، جہاں آراء تبسم اور غزالہ بٹ نے اردو میں اپنے خوبصورت کلام اور اشعار سے محفل کو خوب گرما دیا جس پر سامعین نے انہیں بھرپور داد وتحسین پیش کیا۔

صدر مشاعرہ طاہرہ احساس جتک ، انجمن ادب بلوچستان کی صدر تسنیم صنم اور جہاں آراء تبسم نے خواتین مشاعرہ کےانعقاد پر سیکرٹری کلچرل ڈپارٹمنٹ نور محمد جوگیزئی کا شکریہ ادا کیا اور اس توقع کا اظہار کیا کہ مستقبل میں بھی اس سلسلے کو جاری رکھا جائے گا جبکہ تسنیم صنم نے اپنے خطاب میں معروف محقق، شاعر و کالم نگار آغا نیاز مگسی و دیگر تمام شرکائے تقریب کا بھی شکریہ ادا کیا اور کہا کہ انہوں نے خواتین کی محفل مشاعرہ میں شریک ہو کر ان کی بھرپور حوصلہ افزائی کی ہے ۔ تقریب میں ڈائریکٹر کلچر داؤد ترین، میجر” ر“ نذر حسین ، پروفیسر جوہر بنگلزئی ، شاہین بارانزئی ، سائر عزیز ، احمد وقاص کاشی ، علی اکبر ساسولی و خواتین و حضرات نے کثیر تعداد میں شرکت کی اس سے قبل نور محمد جوگیزئی نے اپنے خطاب میں کہا کہ حکومت ادب و ثقافت کے فروغ کے لیے ہر ممکن اقدامت کر رہی ہے.