وزیرخارجہ کی زیرصدارت مشاورتی کونسل برائے امور خارجہ کا 14واں اجلاس،اہم فیصلے ،اہم اہداف

اسلام آباد: وزیرخارجہ کی زیرصدارت مشاورتی کونسل برائے امور خارجہ کا 14واں اجلاس،اہم فیصلے ،اہم اہداف ،اطلاعات کے مطابق مشاورتی کونسل برائے امور خارجہ کا 14واں اجلاس جمعرات کو وزیر خارجہ مخدوم شاہ محمود قریشی کی زیر صدارت وزارت خارجہ میں منعقد ہوا۔اجلاس میں، افغان امن عمل، بھارتی غیر قانونی مقبوضہ جموں و کشمیر کی صورتحال اور دیگر اہم سفارتی امور کے حوالے سے مشاورت کا سلسلہ تواتر سے جاری رکھنے پر اتفاق کیا گیا۔

مشاورتی کونسل برائے امور خارجہ کا 14ویں اجلاس میں وزیر اعظم کے معاون خصوصی برائے قومی سلامتی معید یوسف، پارلیمانی سیکرٹری برائے خارجہ عندلیب عباس، سیکرٹری خارجہ سہیل محمود، معروف ماہرین امور خارجہ، سابق سفرا اور دیگر اراکین کونسل نے شرکت کی۔

وزیر خارجہ نے اراکین کونسل کو اپنے حالیہ دورہ چین اور اپنے ہم منصب سے ہونے والی ملاقات بارے آگاہ کیا۔ وزیر خارجہ نے افغان امن عمل میں اب تک ہونے والی مثبت پیش رفت سے بھی اراکین کونسل کو مطلع کیا۔

انہوں نے کہا کہ مقبوضہ جموں و کشمیر میں ،5اگست کے یکطرفہ بھارتی اقدام کو ایک سال مکمل ہونے پر، ہم نے پاکستان کے اندر اور دنیا بھر میں پاکستانی سفارت خانوں نے بھرپور انداز میں یوم استحصال منایا اور دنیا کی توجہ ایک مرتبہ پھر کشمیریوں پر ڈھائے جانے والے مظالم کی طرف دلائی۔

مخدوم شاہ محمود قریشی نے کہا کہ وزارت خارجہ نے، وزیر اعظم عمران خان کی ہدایت پر، کورونا وائرس کی وبا کے باعث مختلف ممالک میں پھنسے ہوئے لاکھوں پاکستانیوں کی واپسی کو یقینی بنایا۔ اجلاس میں خطے میں امن و امان کی صورتحال باالخصوص مشرق وسطیٰ کی صورتحال اور اس کے اثرات کے حوالے سے تفصیلی تبادلہ خیال کیا گیا