کابل ایئرپورٹ پربھگدڑ: ہوائی فائرنگ سے7 افراد ہلاک، متعدد زخمی

کابل: کابل ایئرپورٹ پربھگدڑ: ہوائی فائرنگ سے7 افراد ہلاک، متعدد زخمی،اطلاعات کے مطابق کابل ایئرپورٹ پر افراتفری کے دوران طالبان کی ہوائی فائرنگ سے بھگدڑ مچ گئی، سات افراد ہلاک، متعدد زخمی ہو گئے۔

برطانوی فوج کا کہنا ہے کہ افغانستان کے دارالحکومت کابل کے ایئرپورٹ میں زبردستی داخل ہونے کی کوشش کے دوران افراتفری کے نتیجے میں مزید 7 افغان باشندے ہلاک ہوگئے۔

غیر ملکی خبر رساں ادارے ایسوسی ایٹڈ پریس (اے پی) کی رپورٹ کے مطابق یہ واقعہ اس بات کو ظاہر کرتا ہے کہ افغانستان چھوڑنے کے خواہشمند افراد کے لیے اب بھی خطرہ موجود ہے۔برطانوی فوج نے کابل ایئر پورٹ پر پیش آنے والے واقعے میں 7 افراد کی ہلاکت کی تصدیق کی۔

رپورٹ کے مطابق واقعے میں ہلاک ہونے والوں کو افراتفری کے دوران گہری چوٹیں آئیں، یہ وہ لوگ تھے جو بیرون ملک جانا چاہتے تھے اور طالبان نے انہیں ایئر پورٹ میں داخلے سے روکنے کے لیے ہوائی فائرنگ کی تھی۔

برطانوی وزارت دفاع کے جاری بیان کے مطابق ‘زمین پر موجود حالات تا حال چیلنجنگ ہیں لیکن ہم صورت حال کو بہتر کرنے کے لیے اپنی تمام کوششیں بروئے کار لا رہے ہیں’۔

خیال رہے کہ گزشتہ ہفتے اتوار کے روز طالبان کے کابل پر کنٹرول سنبھالنے کے بعد پیر کے روز ہزاروں افغان باشندے ایئرپورٹ پر بیرون ملک جانے کی خواہش میں رن وے تک پہنچ گئے تھے جس کے بعد امریکی ہیلی کاپٹر نے لوگوں کو خبردار کرکے رن وے سے دور کرنے کی کوشش کی تھی،

اس دوران متعدد افغان باشندے امریکی کارگو طیارے پر سوار ہونے کی کوشش کے دوران اس سے لٹک گئے تھے اور طیارے کے پرواز کرنے کے بعد گر کر اور کچھ اس کے گیر میں آکر ہلاک ہوگئے تھے۔

امریکی ٹرانسپورٹیشن حکام نےمتعدد ایئرلائنز کوالرٹ رہنےکیلئے خط لکھ دیے ہیں۔ کابل ائیرپورٹ پر 4500 امریکی فوجی تعینات ہیں اور 900 برطانوی فوجی ایئرپورٹ کی حفاظت اور گشت کے لیے موجود ہیں۔