چیئرمین کشمیر کمیٹی سیّد فخر امام نے کہا کہ چین اور پاکستان کے تعلقات جدید دنیا کیلئے ایک ماڈل ہیں،
اسلام آباد ۔ 30 اکتوبر (اے پی پی) چیئرمین کشمیر کمیٹی سیّد فخر امام نے کہا کہ چین اور پاکستان کے تعلقات جدید دنیا کیلئے ایک ماڈل ہیں، پاک۔چین تعلقات طویل المدتی پائیدار تعلقات کا بہترین نمونہ ہیں، پاکستان اور چین متعدد پیداواری شعبوں میں تعلقات کو مزید بڑھا سکتے ہیں۔ ان خیالات کا اظہار انہوں نے بدھ کو پاک۔چین زرعی تعاون فورم سے خطاب کرتے ہوئے کیا۔انہوں نے کہا کہ 5 اگست کے اقدام کے بعد چین نے عالمی سطح پر ہمیشہ کی طرح پاکستان کے مؤقف کا ساتھ دیا ہے۔ انہوں نے کہا کہ چین ہر مشکل گھڑی میں پاکستان کے ساتھ کھڑا ہے، پاکستان اور پاکستانی عوام کی طرف سے چین کی حکومت اور عوام کا شکریہ ادا کرتے ہیں،
انہوں نے کہا کہ وزیراعظم عمران خان زرعی معیشت کی ترقی پر خصوصی توجہ دے رہے ہیں، ہمارے جی ڈی پی کا 40 فیصد براہ راست زرعی معیشت سے جڑا ہے، چین کی سائنس و ٹیکنالوجی میں ترقی کو استعمال کرکے پاکستان اپنی زرعی پیداوار کو کئی گنا بڑھا سکتا ہے،