پاکستان کی سینئر اداکارہ عتیقہ اوڈھو نے اپنے بہترین دوست اور ساتھی اداکار نعمان اعجاز کے متنازعہ وائرل ویڈیو کلپ کے پیچھے کی کہانی بیان کردی۔
باغی ٹی وی : گزشتہ روز سے سوشل میڈیا پر نعمان اعجاز کا عفت عمر کے شو میں شرکت کا ایک ویڈیو کلپ وائرل ہو رہا ہے جس میں وہ شادی شدہ ہونے کے باوجود دوسری خواتین کے ساتھ اپنے معاشقے کے بارے میں بات کر رہے ہیں-
نعمان اعجاز کا یہ ویڈیو کلپ دیکھنے کے بعد سے سوشل میڈیا صارفین اداکار کو شدید تنقید کا نشانہ بنارہے ہیں تاہم کچھ صارفین ایسے بھی ہیں جو نعمان اعجاز کی حمایت کرتے نظر آرہے ہیں۔
اس موضوع بحث میں جہاں سوشل میڈیا صارفین تبصرے کررہے ہیں تو وہیں اداکارہ عتیقہ اوڈھو اپنے دوست کا ساتھ دینے میدان میں آگئی ہیں۔
سماجی رابطے کی ویب سائٹ انسٹاگرام پر عتیقہ اوڈھو نے نعمان اعجاز کے ہمراہ اپنی ایک تصویر پوسٹ کی اور کیپشن میں اداکار کی حمایت میں ایک پیغام بھی تحریر کیا-
عتیقہ اوڈھو نے نعمان اعجاز کو مخاطب کرتے ہوئے لکھا کہ میرے پیارے دوست آپ میں لوگوں کی توجہ حاصل کرنے کی ایک بہترین صلاحیت موجود ہے آپ نے جو باتیں مذاق میں بولی تھیں لوگوں نے اُن تمام باتوں کو اس قدر سنجیدگی سے لیا ہے کہ اب آپ موضوع بحث بن گئے ہو اور واقعی لوگوں کی توجہ حاصل کرنے کا یہ ایک بہترین طریقہ ہے۔
https://www.instagram.com/p/CE7UAxxgY3z/?utm_source=ig_embed
اداکارہ نے نعمان اعجاز کی اہلیہ رابعہ کا ذکر کرتے ہوئے لکھا کہ میں رابعہ کو داد دیتی ہوں کہ جو یہ سب دیکھنے کے بعد خوب ہنسیں اور مذاق کو مذاق میں ہی لیا۔
اُنہوں نے اپنے پیغام میں نعمان اعجاز کو اسکرین نہ چھوڑنے کا بھی مشورہ دیا عتیقہ اوڈھو نے لکھا کہ آپ ایک مزاحیہ شخصیت کے مالک ہو کبھی بھی اسکرین نہیں چھوڑنا ہمیشہ مُسکراتے رہو اور دوسروں کی چھوٹی ذہنیت کو اُجاگر کرتے رہو یہ وہ لوگ ہیں جو مذاق کو سنجیدہ لیتے ہوئے صرف ایک لمحے میں کسی کی ذات پر تبصرے شروع کردیتے ہیں لیکن سالوں کی خدمات کو نظر انداز کردیتے ہیں۔
عتیقہ اوڈھو نے مزید لکھا کہ آگے بڑھتے رہو اور ہمیشہ کی طرح کامیابی کے راستے پر چلو۔
واجح رہے کہ مذکورہ کلپ کے وائرل ہونے کے بعد سامنے آنے والی تنقید کے بارے میں برطانوی نشریاتی ادارے سے بات کرتے ہوئے نعمان اعجاز کا کہنا تھا کہ وہ اس معاملے کو بڑھاوا نہیں دینا چاہتے۔
انہوں نے کہا کہ لوگوں کو گالیاں نکالنے دیں اور اپنے ذہنوں کو گندا کرنے اور کڑھنے دیں۔ یہ پاکستانیوں کی عادت ہے ان کو اپنی زندگیوں میں کوئی دلچسپی نہیں ہے اور کوئی اپنے گریبان میں نہیں جھانک رہا بس دوسرے پر انگلی اٹھانے کی عادت ہے۔
ان کا کہنا تھا کہ لوگوں کو جو کہنا ہے کہنے دیں میری ذات کو اس سے کوئی فرق نہیں پڑتا میں جانتا ہوں اور میرا رب جانتا ہے مجھے کسی انسان کو وضاحت دینے کی کوئی ضرورت نہیں ہے۔
