سال 2020 کے اختتام پر دنیا کا ہر شخص نئے سال کے لیے سال 2020 سے جو کچھ سیکھا اس کے مطابق اپنی ترجیحات کی منصوبہ بندی کر رہا ہے جن میں افراد میں شوبز شخصیات بھی شامل ہیں جو آنے والے سال کے لئے پُر امید ہیں اور وہ کچھ کرنا چاہتی ہیں کیونکہ وہ سال 2020 میں کورونا وبا کی وجہ سے نہیں کر سکیں-
باغی ٹی وی : حال ہی میں نجی ٹی وی چینل ڈان امیجز نے کچھ شوبز شخصیات سے انٹرویو کیا کہ وہ 2021 میں کیا کرنے کا ارادہ رکھتی ہیں اور انہوں نے 2020 سے کیا سیکھا تاہم زیادہ تر شوبز شخصیات کا کہنا تھا کہ وہ فلاحی کاموں کو ترجیح دیں گی-
اس حوالے سے اداکارہ عائشہ عمر کا کہنا تھا کہ وہ نئے سال میں اپنی ذہنی سمیت جسمانی و جذباتی صحت کو بہتر بنانا چاہتی ہیں وہ آنے والے سال میں ڈائٹ کرنے سمیت میوزک اور پینٹنگ میں بھی وقت گزاریں گی۔
اداکارہ انوشے اشرف کا کہنا تھا کہ وہ نئے سال میں جانوروں اور بچوں کے حقوق سمیت ماحولیاتی و تعلیم کی بہتری کے لیے کوئی فلاحی کام کرنے کا ارادہ رکھتی ہیں کیوں کہ انہیں ایسے کاموں سے بہت پیار ہے۔
جبکہ اداکارہ ثروت گیلانی کا کہنا تھا کہ نئے سال کے لیے ان کی ترجیحات یہ ہیں کہ آئین پاکستان میں تبدیلی کرکے بچوں اور خواتین کے تحفظ کے لیے سخت اور بہتر قوانین بنائے جائیں۔
ساتھ ہی انہوں نے کہا کہ سال 2020 میں انہوں نے سخت کام کرنا سیکھا جس کے بدلے اگرچہ انہیں کوئی ایوارڈ نہیں ملا تاہم انہیں سیکھنے کے لیے بہت کچھ ملا۔
رپورٹ کے مطابق اداکار احسن خان کا کہنا تھا کہ وہ سال 2020 کو دیکھتے ہوئے نئے سال سے بہت زیادہ اور حتمی توقعات نہیں رکھ سکتےکیوںکہ کورونا کی وبا نے ہمیں بہت کچھ سکھا دیا ہے کہ اپنے پیاروں کی قدر کریں مادی چیزوں کے پیچھے نہ بھاگیں۔
انہوں نے مداحوں کو مشورہ دیا کہ اگر وہ نئے سال کے لیے کوئی منصوبہ بندی کر رہےہیں تو وہ اس کی مکمل کرنے کے لیے سخت محنت کریں۔
گلوکار بلال مقصود نے نئے سال سے کورونا ویکسین کی دستیابی کی امید لگا رکھی ہے اور ساتھ ہی انہوں نے 2020 کے لیے کہا کہ انہوں نے اس سال سے جو سب سے اچھی چیز سیکھی وہ یہ تھی کہ انسان کو ہر چھوٹی چھوٹی نعمت اور دستیاب چیز پر شکر ادا کرنا چاہیے۔
گلوکار فلک شبیر کا کہنا تھا کہ سال 2020 میں ہم لوگوں نے سیکھا کہ صحت ہی سب سے بڑی دولت ہے اور اس سال انہوں نے اپنے پیاروں اور خاص طور پر والدین کے ساتھ بہت اچھا وقت گزارا اور وہ نئے سال کو پرامن ترین سال دیکھنا چاہتے ہیں۔
جبکہ دیگر شوبز شخصیات کے برعکس اداکار عماد عرفانی کا کہنا تھا کہ 2021 میں بھی ہم ہر سال کی طرح پچھلے سال کے نامکمل کام پورے کریں گے۔
