شہزادہ ہیری اور میگھن مارکل کے سنسنی خیز انٹرویو کے بعد اب امریکن ٹاک شومیزبان اوپرا ونفرے بھارتی اداکارہ پریانکا چوپڑا کے انٹرویو کی وجہ سے خبروں کا حصہ بنی ہوئی ہیں-
باغی ٹی وی : اداکارہ پریانکا چوپڑا جو اکثر فخریہ طور پر خود کو ‘گلوبل سٹیزن’ کہتی ہیں، انہوں نے اوپرا ونفرے کے شو ‘سپر سول’ میں شرکت کی جس کا ایک پرومو وائرل ہوگیا ہے جس میں بھارتی اداکارہ پریانکا چوپڑا بھارت میں ہونے والی اپنی سیکولر پرورش اور مذہبی نظریات سے متعلق بات کر رہی ہیں۔
ایک منٹ اور 56 سیکنڈ طویل اس پرومو میں پریانکا چوپڑا یہ گفتگو کر رہی ہیں کہ اپنی پوری زندگی میں وہ کس طرح عیسائیت، اسلام اور ہندو مذہب جیسے مختلف مذاہب سے جڑی رہیں۔
پریانکا چوپڑا اس شو میں حال ہی میں ریلیز ہونے والی اپنی آپ ‘ان فنشڈ’ کی پروموشن کے لیے گئی تھیں۔
لگ بھگ 2 منٹ کے دورانیے پر مشتمل پرومو میں اوپرا ونفرے نے پریانکا چوپڑا سے پوچھا کہ کیا ان کی ‘روحانی بنیاد’ ہے۔
جس کا جواب دیتے ہوئے پریانکا چوپڑا نے کہا کہ’ میرا خیال ہے کہ میں اس تحربے سے گزری ہوں، آپ ٹھیک کہتی ہیں، جس ملک میں، میں رہی وہاں بھی کافی مذاہب ہیں’۔
انہوں نے کہا کہ ‘میں کانوینٹ اسکول میں پلی بڑھی، اس لیے میں عیسائیت سے آگاہ تھی جب کہ میرے والد مسجد جایا کرتے تھے اس لیے میں اسلام کے بارے بھی بہت بہتر جانتی ہوں۔
پریانکا چوپڑا نے کہا کہ ہندو خاندان اور ہندو ہونے کے ناطے میں نے ہندو رسم ورواج اور تعلیمات کے تحت خود کو ڈھال لیا-
اداکارہ نے کہا کہ روحانیت، بھارت کا اتنا بڑا حصہ ہے کہ آپ اسے نظرانداز نہیں کرسکتے۔
انہوں نے مزید کہا کہ وہ اپنے والد کی تعلیمات پر یقین رکھتی ہیں جنہوں نے یہ سکھایا کہ تمام مذاہب ایک ہی خدا کی طرف جاتے ہیں۔
پریانکا نے بتایا کہ میں ہندو ہوں میرے گھر میں ایک مندر ہے میں جو ہوسکتا ہے وہ کرتی ہوں لیکن سچ یہ ہے کہ مجھے یقین ہے جو اعلیٰ طاقت ہے وہ ہر جگہ موجود ہے اور میں اس پر یقین رکھتی ہوں۔
