اسلام آباد:اہم غیرملکیوں کو لے کر پی آئی اے کی ایک اورپرواز کابل سے اسلام آباد پہنچ گئی،اطلاعات کے مطابق کابل سے غیر ملکی مسافروں کو لے کر پاکستان انٹرنیشنل ائیرلائنز (پی آئی اے) کی پرواز اسلام آباد پہنچ گئی۔
پاکستان سول ایوی ایشن ذرائع کے مطابق کابل سے واپس آنے والی پرواز سے 140 سے زائد غیر ملکی مسافر اسلام آباد پہنچے ہیں ، یہ بھی بتایا گیا ہے کہ دوسری پرواز بھی کچھ دیر میں کابل روانہ ہوگی۔ پی آئی اے کے چیف ایگزیکٹو آفیسر ( سی ای او) بھی پرواز میں کابل پہنچے تھے۔
ترجمان پی آئی اے کے مطابق خصوصی پروازیں کابل میں پھنسے پاکستانیوں اور دیگر غیر ملکیوں کو پاکستان لانے کے لیے چلائی جارہی ہیں۔حکام کے مطابق پہلی پرواز ائیربس 320 تھی جبکہ دوسری بوئنگ 777 سے آپریٹ ہو گی۔
یہ بھی یاد رہے کہ پاکستانی سول ایوی ایشن حکام کابل ائیرپورٹ پر افغان سول ایوایشن اور نیٹو افواج حکام سے اہم ملاقاتیں کرنے کے لیے پہلی پرواز کے ساتھ گئے تھے۔
