پٹرول،ایل پی جی کے بعد سی این جی بھی مہنگی کردی گئی

لاہور:پٹرول،ایل پی جی کے بعد سی این جی بھی مہنگی کردی گئی،اطلاعات کے مطابق لاہور سمیت پنجاب بھر کے اسٹیشنوں پر سی این جی کی قیمت میں 8 روپے فی کلو اضافہ کردیا گیا۔

ذرائع کے مطابق ملک میں‌ درآمدی آر این جی پر چلنے والے اسٹیشنوں پر سی این جی کی قیمتوں میں اضافہ ہو گیا۔ 8 روپے فی کلو اضافے سے سی این جی 124 روپے فی کلو ہو گئی۔

سی این جی اسٹیشن پر آئے خریداروں کا کہنا تھا کہ پیٹرول کے بعد سی این جی میں اضافہ سمجھ سے باکا تر ہے، سستا ایندھن پیٹرول کے برابر کردیا گیا، گاڑی چلانے مشکل بنا دیا گیا ہے۔ غریب عوام کے فیول کو سستا کیا جائے۔

آل پاکستان سی این جی ایسوسی ایشن کا کہنا ہے کہ قیمتوں میں اضافہ سیلز ٹیکس میں اضافہ، اسپاٹ مارکیٹ کی مہنگی خرید اور ڈالر کی قدر میں اضافے کی وجہ سے ہوا ہے۔حکومت سے مطالبہ ہے کہ پٹرول اور ایل پی جی کی طرح، ایل این جی کی امپورٹ پر بھی فوری طور پر سیلز ٹیکس کم کرے۔