آنجہانی اداکار سوشانت سنگھ کے 5 رشتہ دار ٹریفک حادثہ میں جاں بحق

آنجہانی بالی ووڈ اداکار سوشانت سنگھ راجپوت کے 5 رشتے داروں سمیت 6 افراد بھارتی ٹریفک حادثے میں ہلاک ہوگئے۔

باغی ٹی وی :ِ "انڈین ایکسپریس” کے مطابق ہلاک و زخمی ہونے والے افراد سوشانت سنگھ راجپوت کے بہنوئی او پی سنگھ جو کہ ہریانہ کے پولیس آفیسر ہیں کی بہن کی آخری رسومات میں شرکت کرکے منگل کی صبح تقریباً 6.30 بجے ان کی گاڑی کوریاست بہار کے ضلع لکھی سرائی کے نیشنل ہائی وے 333 میں حادثہ پیش آگیا۔

بھارتی میڈیا کا کہنا ہے کہ گاڑی کا ڈرائیور سوگیا تھا جس کی وجہ سے گاڑی ایل پی جی سلنڈرز سے بھرے ہوئے ایک ٹرک سے جا ٹکرائی اور حادثہ پیش آگیا۔
لکھی سرائی ضلع کے سپرٹنڈنٹ سشیل کمار نے حادثے کی تصدیق کرتے ہوئے اسے ایک خوفناک حادثہ قرار دیا۔

حادثے میں گاڑی کے ڈرائیورسمیت 6 افراد ہلاک ہوئےجبکہ 4 افراد زخمی ہیں، جنہیں تشویشناک حالت میں اسپتال منتقل کیا گیا ہے میڈیا رپورٹس کے مطابق ہلاک ہونے والے افراد سوشانت سنگھ راجپوت کے دور کے رشتے دار تھے حادثے کی اطلاع ملتے ہی بہار کے وزیر اور سوشانت سنگھ راجپوت کے رشتے دار نیرج سنگھ ببلو حادثے میں ہلاک ہونے والے افراد کے اہلخانہ سے ملاقات کے لیے جموئی پہنچے۔

واضح رہے کہ اداکار سوشانت سنگھ راجپوت گزشتہ برس 14 جون کو ممبئی میں اپنے فلیٹ میں مردہ حالت میں پائے گئے تھے۔ ممبئی پولیس نے تصدیق کی تھی کہ 34 سالہ اداکار نے پھانسی لگا کر خودکشی کی ہے۔