یوم آزادی مبارک ہو! آج 73 واں یوم آزادی ملی جوش و جذبے سے پاکستان سمیت دنیا بھر میں منایا جارہا ہے

اسلام آباد : قوم کو73 واں یوم آزادی مبارک ہو،آج پاکستانی قوم 73 واں یوم آزادی روایتی جوش وخروش اورجذبے سے منا رہی ہے۔ ملک بھر میں سرکاری عمارتوں، سڑکوں اور راستوں کو قومی پرچموں سے سجایا گیا ہے۔یوم آزادی پر دن کا آغاز توپوں کی سلامی سے ہوا۔تفصیلات کے مطابق ملک بھر میں یوم آزادی کشمیریوں سے اظہار یکجہتی کے طور پر منایا جا رہا ہے۔ پاکستان کے علاوہ دنیا بھر میں مقیم پاکستانی اور پاکستان سے محبت کرنے والے غیر ملکی بھی پاکستان کا 73 واں یوم آزادی منا رہے ہیں.

ذرائع کے مطابق وفاقی دارالحکومت اسلام آباد میں یوم آزادی کے دن کا آغاز 31 توپوں جبکہ صوبائی دارالحکومتوں میں 21،21 توپوں کی سلامی سے ہوا۔ اس موقع پر ملک کی سلامتی اور یکجہتی کے لیے خصوصی دعائیں بھی کی گئیں۔بچے جوان سبھی یوم آزادی کی خوشی میں سبزہلالی پرچم لئے ہر طرف ریلیوں کی صورت میں چل پھر کر خوشی منا رہے ہیں.

یوم آزادی پر صوبہ پنجاب کے دارلحکومت لاہورمیں دن کا آغاز 21 توپوں کی سلامی سے ہوا، اس موقع پر فضا تکبیر کے نعروں سے گونج اٹھی۔یوم آزادی کے موقع پر پشاور میں بھی 21 توپوں کی سلامی دی گئی۔ یوم آزادی پرتوپوں کی سلامی کی یہ تقریب کینٹ کے پانڈو اسٹیڈیم میں ہوئی جبکہ کوئٹہ کے آرمی پولوکلب میں بھی پاک فوج کے جوانوں کی جانب سے 21 توپوں کی سلامی دی گئی۔کراچی میں بھی دن کا آغاز 21 توپوں کی سلامتی سے کیا گیا۔ شہر شہر نمازفجرکی ادائیگی کے بعد مساجد میں ملکی ترقی وسلامتی اور خوشحالی کے لیے خصوصی دعائیں بھی کرائی گئیں۔

یاد رہے کہ آج یوم آزادی کے موقع پر پرچم کشائی کی مرکزی تقریب اسلام آباد میں ہوگی۔ کشمیری عوام سے یکجہتی کے لیے قومی پرچم کے ساتھ کشمیرکا جھنڈا بھی لہرایا جائے گاوزیراعظم عمران خان کشمیریوں سے اظہار یکجہتی کے لیے آزاد کشمیر کے دارالحکومت مظفرآباد جائیں گے اور آزاد کشمیر کی قانون ساز اسمبلی سے خطاب بھی کریں گے۔