سابق وزیراعظم عمران خان کے ایک اور قریبی ساتھی سابق مشیر خزانہ عبدالحفیظ شیخ نے گرفتاری سے بچنے کیلئے عدالت سے رجوع کر لیا.
باغی ٹی وی کی رپورٹ کے مطابق سابق وزیر خزانہ عبدالحفیظ شیخ پر نجی کمپنی کو فائدہ پہنچانے کے الزام کی درخواست پر سماعت ہوئی، جس میں درخواست گزار کے وکیل نے موقف دیا کہ عبد الحفیظ نے احتساب عدالت میں پیش ہونا ہے، درخواست گزار اس وقت دبئی میں رہائش پذیر ہیں جبکہ نیب کے ساتھ مکمل تعاون کے لیے تیار ہیں۔
عدالت نے عمران خان کے قریبی ساتھی عبد الحفیظ شیخ کی 10 روز کے لیے حفاظتی ضمانت منظور کرتے ہوئے ایک لاکھ روپے کے مچلکے جمع کرانے کا حکم دیتے ہوئے کہا کہ وطن واپسی پر نیب حفیظ شیخ کو گرفتار نہ کرے۔
نیب حکام کا کہنا ہے کہ سابق مشیر خزانہ عبدالحفیظ شیخ کیخلاف کراچی کی احتساب عدالت میں ریفرنس دائر کردیا گیا ہے۔
اس سے قبل احتساب عدالت نے سابق مشیر خزانہ حفیظ شیخ کے وارنٹ گرفتاری جاری کئے تھے جبکہ ذرائع کے مطابق سابق مشیر خزانہ پر ایک کروڑ 12 لاکھ ڈالر کا قومی خزانے کو نقصان پہنچانے کا الزام ہے۔
