وزارت اطلاعات و نشریات پریس انفارمیشن ڈیپارٹمنٹ کے ذیلی ادارے پاکستان انفارمیشن سنٹر کے زیر اہتمام لاہور پریس کلب میں موبائل جرنلزم کے موضوع پر دو روزہ تربیتی ورکشاپ کا انعقاد کیا گیا۔
مذکورہ ورکشاپ کے پہلے روز پرنٹ و الیکٹرانک میڈیا سے تعلق رکھنے والے سینئر صحافیوں کی کثیر تعداد نے شرکت کی ۔ورکشاپ کے پہلے روز ورچوئل یونیورسٹی کے ٹرینرز ذیشان نذیر اور اظہر سمرانےصحافیوں کو موبائل سے ویڈیو بنانے اسکی ایڈیٹنگ کرنے سمیت تکنیکی معاملات کو بہت اچھے انداز میں سمجھایا جبکہ مختلف موضوعات پر دوران ورکشاپ شرکاء سے ویڈیوز بھی بنوائیں۔
ورکشاپ کے آغاز میں ڈائریکٹر جنرل پریس انفارمیشن ڈیپارٹمنٹ لاہور سجیلہ نوید نے کہا کہ صحافیوں کو جدید ٹیکنالوجی سے آگاہی ان کی اولین ترجیح ہے اور ان کی کوشش ہے کہ وہ اس طرح کی ورکشاپس کرواتی رہیں۔انہوں نے اس عزم کا اظہار کیا کہ صحافیوں کے استعداد کار میں اضافے کے لیے آنے والے دنوں میں وزارت اطلاعات و نشریات، پریس انفارمیشن ڈیپارٹمنٹ کی طرف سے ایسے منصوبے جاری رہیں گے. ورکشاپ کا دوسرا سیشن ہفتہ کو ہوگا۔
