‘لوگوں کو سڑکوں پر نکلنے کی کال دیکر انقلاب خود بنی گالہ میں چھپ کر بیٹھا ہے’:مریم اورنگزیب

اسلام آباد:سابق وزیراعظم عمران خان کی قوم سے گفتگو کوحکومتی ارکان نے بہت اہم لیا ہے اورفوری ردعل دینا شروع کردیا ہے ، اسی سلسلے میں وفاقی وزیر اطلاعات مریم اورنگزیب نے کہا ہے کہ لوگوں کو سڑکوں پر نکلنے کی کال دیکر انقلاب خود بنی گالہ میں چھپ کر بیٹھا ہے۔

پاکستان کے موجودی سیاسی معاشی اور معاشراتی حالات پر پی ٹی آئی چیئرمین عمران خان کے ویڈیو لنک خطاب پر ردعمل دیتے ہوئے مریم اورنگزیب نے کہا کہ منافق اور چور میں بنی گالہ سے نکلنے کی ہمت نہیں، 25 مئی کو خونی مارچ کا اعلان کر کے خود ہیلی کاپٹر میں معلق رہے، ہیلی کاپٹر میں معلق انقلاب اب بنی گالہ میں دو جھنڈے لگا کر سکرین پہ بیٹھا ہے۔

وفاقی وزیر نے مزید کہا کہ مہنگائی، بے روزگاری اور معاشی تباہی مسلط کرنے والے انقلاب کی باہر نکلنے کی ہمت نہیں ہے، آپ جانتے ہیں یہ سب آپ نے کیا، اسی لئے آپ کا انقلاب ٹی وی سکرین سے باہر نہیں آ رہا، مہنگائی 3 سے 16 فیصد کرنے والے انقلاب ٹی وی سکرین اور ہوا میں معلق ہیلی کاپٹر میں ہی آ سکتے ہیں، 43 ہزار ارب کا تاریخی قرضہ لینے والا انقلاب سکرین پہ ہی آ سکتا ہے، کشمیر فروشی کرنے والے ٹی وی سکرین اور معلق ہیلی کاپٹر پر ہی انقلاب لاسکتے ہیں۔