وفاقی کابینہ کے آج ہونے والے اجلاس میں توانائی بچت پلان پیش کیا جائیگا۔

وفاقی کابینہ کے آج ہونے والے اجلاس میں توانائی بچت پلان پیش کیا جائیگا۔

وفاقی کابینہ کا اجلاس آج ہوگا جس میں توانائی کی بچت کا قومی ہنگامی پلان منظوری کیلیے پیش کیا جائیگا۔ اجلاس صبح 11 بجے وزیر اعظم ہاؤس میں ہوگا جس کی صدارت وزیر اعظم شہباز شریف کریں گے، تمام وزرائے اعلیٰ بھی اجلاس میں مدعو ہیں۔ انرجی بچت پلان پر صوبوں کی مشاورت کے ساتھ فیصلہ کیا جائیگا، بجلی چوروں کے خلاف کریک ڈاؤن کا بھی فیصلہ کیا جائیگا جبکہ نجی اور سرکاری عمارتوں کو شمسی توانائی پر منتقل کرنے کی منظوری دی جائے گی۔

یاد رہے گزشتہ روز وزیر اعظم نے اجلاس کے دوران متعلقہ حکام کو ہدایت کی تھی کہ توانائی کے شعبے میں موجود گردشی قرضے کو کم کیا جائے ۔ انہوں نے کہا تھا کہ مسلم لیگ ن کی حکومت بہتر پالیسی کے ذریعے 2013 سے 2018 میں اپنے دور حکومت کے دوران گردشی قرضے کو مکمل ختم کرنے کا عملی ثبوت دے چکی ہے۔وزیر اعظم نے اس عزم کا اظہار کیا تھا کہ مسلسل محنت اور مؤثر حکمت عملی سے اب بھی اس مسئلے پر دوبارہ قابو پا لیں گے ۔

وزیر اعظم نے متعلقہ حکام کو ہدایت کی تھی کہ توانائی کے شعبے میں اصلاحات کا عمل اس طرح مکمل کیا جائے کہ گردشی قرضہ بتدریج کم ہو کر بالآخر ختم ہو جائے۔ انہوں نے کہا کہ سوئی گیس کی تقسیم کار کمپنیاں بلوں کی ریکوری کے نظام کو فوری طور پر بہتر کریں ۔ انہوں نے ہدایت کی تھی کہ بجلی اور گیس کے صارفین پر کوئی اضافی بوجھ نہ ڈالا جائے ۔وزیر اعظم نے بجلی اور گیس کے بلوں کی وصولی کے نظام کو بھی مزید موثر بنانے کی بھی ہدایت کی تھی

وزیر اعظم نے متعلقہ حکام کو ہدایت کی تھی کہ توانائی کے شعبے کے محصولات میں اضافے کو یقینی بنانے کے لئے تمام ممکن اقدامات اٹھائے جائیں، اس مقصد کے لئے ترسیل کے نظام کو بہتر بنایا جائے تاکہ بجلی اور گیس کی چوری اور ضیاع کو روکا جا سکے۔اجلاس میں توانائی بچت پلان کا بھی جائزہ لیا گیا ۔ یہ پلان آج منگل کو وفاقی کابینہ کے اجلاس میں پیش کیا جائےگا جس میں صوبائی وزرا اعلیٰ کو بھی مدعو کیا گیا ہے۔