امام مسجد اور اہلیہ کا قاتل گرفتار

بھارتی ریاست ہریانہ میں امام مسجد محمد عرفان اور اس کی اہلیہ یاسمین کو بہیمانہ طریقے سے شہید کرنے والے ملزم ستبیر سنگھ کو بھارتی پولیس نے عدالت میں پیش کر دیا۔ گرفتار ملزم ستبیر نے اعتراف جرم کرتے ہوئے کہا ہے کہ اسے شک تھا کہ امام مسجد اس کے خاندان کے خلاف کالا جادو کرتے ہیں ۔
بھارت میں امام مسجد اور انکی اہلیہ کے قتل کی شیریں مزاری نے کی مذمت
واضح رہے کہ مسجد کے پیچھے بنے کمرے میں امام مسجد اپنی اہلیہ کے ساتھ رہتے تھے ۔ ملزم نے انہیں گہری نیند میں اتوار کی رات کو شہید کیا۔

پولیس کے مطابق تفتیش کے دوران گاوں کے ہی ایک رہائشی خورشید نے رپورٹ درج کرائی جس کی بنیاد پر مقدمہ قائم ہوا۔ خورشید نے بتایا کہ ملزم ستبیر سنگھ کو عرفان پر شک تھا کہ وہ اس کے خلاف کالا جادو کرتے ہیں اور اس وجہ سے اس کے والد اور بھائی بیمار رہنے لگے۔

گرفتار ملزم ستبیر نے پولس کے اپنے جرم کا اعتراف کرتے ہوئے کہا ہے کہ وہ رات کو چارپائی کا پایہ لے کر امام عرفان کے گھر میں گھس گیا اور سوتے وقت ان کے سر پر کئی وار کئے۔ اسی دوران ان کی اہلیہ بھی جاگ گئی تو اس نے ان پر بھی حملہ کر دیا اور دونوں کو قتل کر دیا۔