پشاور(باغی ٹی وی رپورٹ) صوبائی وزیر تعلیم فیصل خان ترکئی سے GIZ اور Adidas کے وفد کی ملاقات میں خیبرپختونخوا کے سرکاری سکولوں میں کھیلوں کی سہولیات کے فروغ پر تبادلہ خیال کیا گیا۔ ملاقات میں سپیشل سیکرٹری قیصر عالم، ایڈیشنل ڈائریکٹر سپورٹس افتخار احمد شموزئی، GIZ کی جانب سے لوئس ہانٹ، محمد الیاس، فرزانہ خان، اور Adidas کے نمائندے فلف لیزر نے شرکت کی۔
وزیر تعلیم نے اجلاس میں کہا کہ صوبے کے تعلیمی اداروں میں طلبہ کو نیشنل اور انٹرنیشنل لیول پر کھیلنے کے مواقع فراہم کیے جا رہے ہیں۔ ہر سکول میں کھیل کے میدان اور فزیکل ایجوکیشن اساتذہ موجود ہیں جو طلبہ کی تربیت میں معاون ہیں۔ سالانہ ضلعی اور صوبائی سطح پر کھیلوں کے ٹورنامنٹس منعقد کیے جاتے ہیں، جن کے انتظامات آئندہ سال مزید بہتر بنائے جائیں گے۔
GIZ اور Adidas کے نمائندوں نے سکولوں کے لیے اپنے منصوبے پیش کرتے ہوئے یقین دلایا کہ وہ ان سہولیات کو صوبے کے دیگر اضلاع تک توسیع دیں گے اور کھلاڑیوں کو انٹرنیشنل لیول پر مواقع فراہم کرنے میں مدد کریں گے۔
فیصل خان ترکئی نے وفد کا شکریہ ادا کرتے ہوئے کہا کہ ان کے تعاون سے طلبہ کو آگے بڑھنے کے مزید مواقع میسر آئیں گے۔ انہوں نے ہدایت کی کہ مرد و خواتین کے لیے یکساں منصوبہ بندی کی جائے اور فزیکل ایجوکیشن ٹیچرز کی جدید تربیت کو یقینی بنایا جائے۔
انہوں نے مزید کہا کہ کھیل طلبہ کی ذہنی اور جسمانی نشوونما کے لیے نہایت اہم ہیں اور ضم شدہ اور پسماندہ اضلاع میں کھیلوں کے فروغ کے لیے بھی عملی اقدامات کیے جا رہے ہیں۔ امتحانی بورڈز کے مینڈیٹ میں بھی کھیلوں کا فروغ شامل کیا گیا ہے تاکہ جدید تقاضوں کے مطابق سہولیات میں مزید بہتری لائی جا سکے۔
