اغواء اور بھتہ خوری میں ملوث پولیس اہلکاروں سمیت 5 ملزمان گرفتار

اسپیشلائزڈ یونٹ کے اہلکار اغواء اور بھتہ خوری سے باز نہ آئے، ٹیپو سلطان تھانے کی پولیس نے کامیاب کارروائی کرتے ہوئے دو پولیس اہلکاروں سمیت5 ملزمان کو گرفتار کرلیا۔

اس حوالے سے پولیس حکام نے اے آر وائی نیوز کو بتایا کہ گرفتار ملزمان میں سی آئی اے صدر کا اہلکار ملک ارباز اور ایسٹ ہیڈ کوارٹرز کا اہلکار ذیشان شاہ بھی شامل ہے۔

پولیس کے مطابق گزشتہ روز لال کوٹھی اسٹاپ کے قریب ڈیوٹی پر موجود اہلکاروں نے شک کی بنیاد پر ایک مشکوک گاڑی اور موٹر سائیکل کو روکا۔ تلاشی کے دوران گاڑی سے مغوی بازیاب ہوا جس کا نام راحب حسین ہے، مغوی کو ڈیفنس کے علاقے میں موجود کال سینٹر سے اغواء کیا گیا تھا۔

ایس پی جمشید ٹاؤن فاروق بجارانی کا کہنا ہے کہ معلومات کرنے پر اغوا کاروں نے اپنا تعلق فیڈرل انویسٹی گیشن ایجنسی سے بتایا۔ پولیس افسرنے بتایا کہ ملزمان مغوی کو شہر کے مختلف علاقوں میں گھماتے رہے، اس دوران انہوں نے مغوی کے اے ٹی ایم سے50ہزار روپے بھی نکلوائے۔

فاروق بجارانی کے مطابق ملزمان نے مغوی راحب حسین سے مزید20لاکھ روپے تاوان مانگا، اسی دوران ٹیپوسلطان پولیس نے ملزمان کو گرفتار کیا، ملزمان سے نقدی،گاڑی، موٹر سائیکل، اسلحہ اور دو موبائل فون برآمد ہوئے ہیں۔