نگران وزیراعظم کے مشیر احد چیمہ کو عہدے سے ہٹا دیا گیا

اسلام آباد:نگران وزیراعظم کے مشیر برائے اسٹیبلشمنٹ احد چیمہ کو عہدے سے ہٹا دیا گیا، جس کا نوٹیفکیشن بھی جاری کر دیا گیا ہے-

باغی ٹی وی : صدر مملکت ڈاکٹر عارف علوی نے نگران وزیر اعظم انوارالحق کاکڑ کے مشیر احد چیمہ کو عہدے سے ہٹانے کی منظوری دے دی نگران وزیراعظم نے الیکشن کمیشن کی ہدایت پر احدچیمہ کو عہدے سے ہٹانے کی سمری صدرمملکت کو ارسال کی تھی۔
https://x.com/PresOfPakistan/status/1739288283715195287?s=20
ایوان صدر کے مطابق صدر مملکت نے احد چیمہ کو عہدے سے ہٹانے کی منظوری دے دی، صدر مملکت ڈاکٹر عارف علوی نے احد چیمہ کو عہدے سے ہٹانے کی منظوری آئین کے آرٹیکل 48 ایک کے تحت نگران وزیراعظم کی ایڈوائس پر دی۔
https://x.com/PresOfPakistan/status/1739288278740660490?s=20
واضح رہے کہ الیکشن کمیشن نے نگران وزیراعظم کے مشیر برائے اسٹیبلشمنٹ احد چیمہ کو عہدے سے ہٹانےکا حکم دیا تھاالیکشن کمیشن نے انہیں ہٹانے سے متعلق عملدرآمد رپورٹ مانگی تھی اور رپورٹ نہ ملنے پر نوٹس لیا تھا جس پر کل سماعت ہونی ہے۔

دریں اثنا آج الیکشن کمیشن کے احکامات پر آئی جی اسلام آباد اکبر ناصر خان اور ڈپٹی کمشنر عرفان نواز میمن کو بھی عہدوں سے ہٹا دیا گیا ہے جس کے بعد وزیراعظم آفس نے نئے ڈی سی اور آئی جی اسلام آباد کی تعیناتی کےلیے اسٹیبلشمنٹ ڈویژن سے افسروں کے نام مانگ لیے ہیں ،وزیراعظم آفس کی جانب سے جاری کردہ مراسلے میں کہا گیا کہ وزیراعظم کی منظوری کے لیے افسران کا پینل تجویز کیا جائے۔