پاکستان شوبز انڈسٹری کے نامور اداکار احسن خان ملبوسات کا برانڈ متعارف کرانے جارہے ہیں۔
باغی ٹی وی : احسن خان ان دنوں پی ٹی وی پر رمضان ٹرانسمیشن کی میزبانی کررہے ہیں انہوں نے رمضان المبارک میں ہی اپنے برانڈ کو لانچ کرنے کا فیصلہ کیا ہے جس پر وہ چند دوستوں کے ساتھ مل کر کام کررہے ہیں اور اسی لیے وہ اس بار رمضان ٹرانسمیشن میں بھی اپنے ہی برانڈ ‘احسن خان مارکا’ کے تیار کردہ لباس پہن رہے۔
اس حوالے سے احسن خان نے بتایا کہ میں چاہتا تھا کہ لوگ میرے شو کے ذریعے برانڈ سے آگاہ ہوجائیں اور اس کے بعد میں ایک بڑے مال میں اس کی نمائش کے ساتھ لانچ کرانے کا ارادہ رکھتا تھا۔
احسن خان نے کہا کہ پاکستان میں کورونا وائرس کے بڑھتے کیسز کی وجہ سے میں نے فیصلہ کیا کہ چونکہ مال میں معروف شخصیات کے نمائش اب غیر ذمہ دارانہ اقدام ہوگا لہذا ہم صرف برانڈ کی ویب سائٹ لانچ کرنے جارہے ہیں اس نئے برانڈ میں مردوں، خواتین اور بچوں کے روایتی لباس پر توجہ مرکوز کی جائے گی، اور عام دنوں سمیت تقاریب کی مناسبت سے بھی ڈریسز دستیاب ہوں گے۔
احسن خان اپنے برانڈ کو عید سے چند ہفتے قبل متعارف کروانے کا ارادہ رکھتے ہیں کیونکہ اس دوران پورے پاکستان کی توجہ روایتی ملبوسات کی خریداری پر مرکوز ہوتی ہے۔
انہوں نے بتایا کہ کچھ سال قبل لاہور میں ایک کلاتھنگ ریٹیل کے ساتھ کام کرنے کا ارادہ بنا تھا لیکن اس کے بعد میں کراچی شفٹ ہوگیا اور برانڈ کو متعارف کروانے کے تمام ارادے التوا کا شکار ہوگئے۔
احسن خان نے بتایا کہ انہوں نے یہ برانڈ اپنے چند دوستوں کے ساتھ مل کر شروع کیا ہے، ان کے پاس ڈیزائنر موجود ہے اور کپڑوں کی زیادہ تر تیاری فیصل آباد میں ہوتی ہیں۔
انہوں نے کہا کہ میں چاہتا ہوں کہ اس برانڈ کی رسائی عام لوگوں تک ہو کہ اس کے ڈیزائنز اور قیمتیں مناسب ہوں یہ ایک طویل المدتی منصوبہ ہے، ابھی تیاری کا عمل جاری ہے اور ویب سائٹ جلد شروع کی جائے گی-
احسن خان نے کہا کہ وہ ‘احسن خان مارکا’ کو ایسے لیبل میں تبدیل کرنے کے لیے پرامید ہیں کہ جہاں مرد و خواتین کے لیے کپڑوں کے علاوہ دیگر مصنوعات بھی دستیاب ہوں-
احسن خان نے اپنے برانڈ کا ٹیزر بھی جاری کیا ہے جس میں ایک خاندان کو ساتھ بیٹھے دکھایا گیا اور ساتھ ہی خواتین کے ملبوسات کی جھلک دکھائی گئی ہے۔
