امریکی ڈالر مسلسل مہنگا ہونے لگا
باغی ٹی وی :ملک بھر میں امریکی ڈالر مسلسل مہنگا ہونے لگا، رواں ہفتے کے پہلے کاروباری روز کے دوران روپے کے مقابلے میں امریکی کرنسی 22 پیسے مہنگی ہو گئی۔
تفصیلات کے مطابق ملک بھر میں رواں ہفتے کے پہلے کاروباری روز کے دوران امریکی ڈالر کی قدر مسلسل بڑھتی جا رہی ہے، ڈالر کی قدر بڑھنے کی وجہ سے روپیہ دباؤ کا شکار ہے، آج انٹر بینک میں امریکی ڈالر 22 پیسے مہنگا ہوا جس کے بعد روپے کے مقابلے میں ایک امریکی ڈالر کی قیمت 166 روپے 98 پیسے ہو گئی ہے.
واضح رہے کہ گزشتہ سال کے آغاز میں ڈالر کی قیمت مسلسل بڑھتی رہی، جنوری میں ڈالر 138 روپے93 پیسے، فروری میں 138 روپے 90 پیسے اور مارچ میں 139 روپے10 پیسے تک پہنچ گیا۔
اپریل 2019 میں ڈالر نے بڑی چھلانگ لگئی اور 141 روپے 50 پیسے پر آ گیا۔ مئی میں اس کی قیمت میں تاریخ کا ایک بڑا اضافہ دیکھا گیا اور یہ 151 روپے تک پہنچ گیا۔جون میں ڈالر نے تمام ریکارڈ توڑ دیے اور تاریخ کی بلند ترین سطح 164روپے پر پہنچ گیا۔جولائی 2019 میں ڈالر کی اڑان رک گئی اور ڈالر کمی کے بعد انٹربینک میں 160 روپے اور اوپن مارکیٹ میں 161 روپے کا ہوگیا۔
اکتوبر 2019 کے اختتام پر روپے کی قدر مزید بہتر ہوئی اور ڈالر کی قیمت 155.70 روپے رہ گئی۔ نومبر2019 کے اختتام پر ڈالرکی قیمت خرید 155.25 اور قیمت فروخت 155.65 تھی۔ گزشتہ چھ ماہ سے ڈالر کی قیمت میں مسلسل کمی دیکھنے میں آرہی ہے اور اس دوران 9 روپے کی کمی آئی۔
