آریان خان جیل سے رہائی کے باوجود بدستور صدمے میں، خاموشی اختیار کر لی

بالی ووڈ اداکار شاہ رخ خان کے بیٹے آریان خان جیل سے رہائی کے باوجود ذہنی اذیت کا شکار ہیں-

باغی ٹی وی : "ٹائمز آف انڈیا” کے مطابق آریان خان کے اوپر جیل میں گزارے گئے دنوں کے بہت ہی منفی اثرات مرتب ہوئے ہیں اور ابھی تک ان کی ذہنی کیفیت سنبھل نہیں سکی آریان خان کو جیل سے رہا ہوئے کئی روز گزر چکے ہیں لیکن وہ ابھی تک صدمے میں ہیں۔

بھارتی میڈیا نے شاہ رخ خان فیملی کے قریبی دوست کا حوالہ دیتے ہوئے بتایا کہ آریان خان جب سے جیل سے باہر آئے ہیں وہ زیادہ تر وقت اپنے کمرے میں ہی گزارتے ہیں۔

آریان خان 30 اکتوبر کو ضمانت پر رہا ہوئے تھے اور انہیں جیل کی قید سے رہا ہوئے 12 دن ہوچکے ہیں اور ان 12 دنوں میں انہوں نے اپنے دوستوں سمیت کسی سے بھی ملاقات کرنے میں کوئی دلچسپی ظاہر نہیں کی آریان جو جیل جانے سے قبل کافی ہلہ گلہ کرنے والے شخص تھے اور جنہیں دوستوں کے ساتھ پارٹی کرنا پسند تھا اب بالکل چپ چاپ اور خاموش سے ہوگئے ہیں۔

رپورٹس کے مطابق شاہ رخ خان اور گوری آریان کو سنبھلنے اور اس کیفیت سے نکلنے کے لیے وقت دے رہے ہیں وہ دونوں بھی اس وقت پریشان ہیں اور آریان کو یہ یقین دلانے کی پوری کوشش کررہے ہیں کہ وہ ہمیشہ اس کے ساتھ ہیں۔

آریان کو وقت دینے اور اسے بہتر محسوس کروانے کے لیے ہی شاہ رخ خان نے اپنی تمام شوٹنگز منسوخ کر دیں اور 2 نومبر کو اپنی سالگرہ بھی نہیں منائی اور وہ وقت اپنی فیملی کے ساتھ اپنے گھر کے بجائے علی باغ میں گزارا تاکہ آریان اور ان کے گھر والے اچھا وقت گزار سکیں۔

جیل سے رہائی کے بعد آریان خان گھر میں ہیں تا ہم انکے والد شاہ رخ خان پریشان ہیں ، اب شاہ رخ چاہتے ہیں کہ انکا بیٹا محفوظ رہے اور اس ضمن میں انہوں نے ایک سیکورٹی گارڈ، باڈی گارڈ کی تلاش شروع کر دی ہے جو ہمیشہ آریان کے ساتھ رہے اور انہیں پریشانیوں سے بچائے، وہ چاہتے ہیں کہ روی سنگھ جو شاہ رخ خان کا باڈی گارڈ ہے اسی طرح کا باڈی گارڈ آریان خان کا بھی ہونا چاہئے –

شاہ رخ خان کو فلموں کی شوٹنگ کے لئے بھارت چھوڑنا پڑے گا اور دیگر ممالک کے دورے کرنے ہوں گے،شاہ رخ اپنے باڈی گارڈ روی سنگھ کو ساتھ لے کر جائیں گے، لیکن آریان اکیلا رہ جائے گا، روی سنگھ نے مشکل وقت میں آریان خان کی مدد کی اور اب اسوقت باڈی گارڈ کا بھی کردار ادا کر رہا ہے تا ہم شاہ رخ خان کی بیرون ملک روانگی کے بعد آریان خان کو نئے باڈی گارڈ کی ضرورت ہو گی-

آریان خان کے خلاف منشیات کیس کی تحقیقات این سی بی کی نئی تحقیقاتی ٹیم کر رہی ہے، آریان کو تحقیقات میں شامل ہونے کے لئے بھی جانا پڑے گا جبکہ عدالت میں بھی جانا ہو گا، ایسے میں شاہ رخ خان چاہتے ہیں کہ بھروسے والا اور قابل اعتماد باڈی گارڈ ہو،آریان خان گزشتہ پیشی پر این سی بی کے سامنے پیش نہیں ہوئے اور بیماری کا حوالہ دیا، این سی بی کے ڈائریکٹر سمیر وانکھیڈے کی برطرفی کے بعد کیس کی تحقیقات کرنے والی خصوصی تفتیشی ٹیمنے 23 سالہ آرین سے میڈیکل رپورٹ مانگی ہے-

واضح رہےکہ نارکوٹکس کنٹرول بیورو نے 2 اکتوبر کو ممبئی سے گووا جانے والے ایک بحری جہاز پر چھاپہ مارکر منشیات برآمد کی تھی اس جہاز پر شاہ رخ خان کے بیٹے آریان خان بھی موجود تھے جنہیں منشیات کے الزام میں ان کے 8 دوستوں سمیت گرفتار کیا گیا تھا جس کے بعد آریان خان ممبئی کی آرتھر روڈ جیل میں تقریباً 26 روز تک قید رہے تھے بعد ازاں بومبے ہائی کورٹ نے 28 اکتوبر کو آریان کو ضمانت پر رہا کردیا تھا اور 30 اکتوبر کو وہ جیل سے باہر آئے تھے۔