بلاول بھٹو پاکستان کو ترقی کی راہ پر گامزن کرنے کی بھرپور صلاحیت رکھتے ہیں ، مرتضیٰ وہاب

یڈمنسٹریٹر کراچی مرتضیٰ وہاب نے کہا ہے کہ بلاول بھٹو پاکستان کو ترقی کی راہ پر گامزن کرنے کی بھرپور صلاحیت رکھتے ہیں۔
تفصیلات کے مطابق ایڈمنسٹریٹر کراچی مرتضیٰ وہاب یادگار شہداء کارساز پہنچے ، یادگار شہداء پر پھول چڑھائے ، شہداء کے ایصال ثواب کے لئے فاتح خوانی کی اور جیالے شہداء کی یاد میں پودے لگائے۔
انہوں نے کہا کہ پیپلزپارٹی کا ایک ایک کارکن شہید بی بی اور اسکے شہید جیالوں کو سلام عقیدت پیش کرتا ہے ، اٹھارہ اکتوبر کے شہید جیالوں کی قربانی رہتی دنیا تک یاد رکھی جائیگی ، بی بی شہید کے جیالوں نے جمہوریت کی بقاء کے لیے اپنی جانوں کے نذرانے دیے۔
ایڈمنسٹریٹر کراچی مرتضیٰ وہاب نے کہا کہ شہید بی بی کا لخت جگر بلاول بھٹو زرداری پاکستان کا روشن مستقبل ہے ، بلاول بھٹو پاکستان کو ترقی کی راہ پر گامزن کرنے کی بھرپور صلاحیت رکھتے ہیں ، وہ دن دور نہیں جب شہید بی بی کا بیٹا ہمارا چیئرمین بلاول بھٹو اس ملک کا وزیراعظم ہوگا۔