"ڈپریشن کی ابتدا کے اسباب اور حل” تحریر محمد عبداللہ

اپنے آپ کو وقت دینا اس دور جدید کا سب سے مشکل بلکہ ناممکن سا کام بن چکا ہے. اہل و عیال، امور معاش، دوست احباب، سماجی رسوم و رواج اور دیگر امور میں انسان اتنا الجھا ہوتا کہ اپنے آپ سے دور سے دور ہوتا چلا جاتا ہے. ان کاموں سے کچھ فرصت ملتی ہے تو سوشل میڈیا پلیٹ فارمز ہمارے وقت اور توجہ کے لیے منہ کھولے کھڑے ہیں.
اس سب کا نتیجہ یہ نکلتا ہے کہ انسان کے جسم اور روح توجہ نہ ملنے کے باعث الجھ جاتے ہیں. جسمانی طور پر وزن کا بڑھنا اور جسم کا مختلف بیماریوں میں گھر جانا عام سے عام ہوچکا ہے. ہمارے ” امیون سسٹم”اس حد تک کمزور ہوچکے ہیں کہ ادھر موسم تھوڑا سا بدلتا نہیں ادھر ڈاکٹرز کے کلینکس کی پارکنگ تک میں جگہ نہیں ملتی…
روحانی اورذہنی طور پر نقصانات اس سے بھی زیادہ ہوتے کہ بےسکونی، عدم برداشت اور ڈپریشن جیسے خطرناک مرض اپنی جگہ بنا لیتے اور رفتہ رفتہ بندے کو کھوکھلا کر دیتے ہیں. ڈپریشن اس دور جدید میں اس حد تک عام ہوچکا ہے کہ جس سے بھی پوچھو گے وہ ہی اس مرض کا شکار ملے گا.
ان سب کی دیگر وجوہات بھی ہوسکتی ہیں لیکن سب سے بڑی وجہ اپنے آپ سے دوری ہے. اپنے آپ کو وقت نہ دینا، اپنے آپ کو توجہ نہ دینا سب سے بڑی غفلت ہوتی جو انسان کو بہت دور تک لے جاتی ہے.
انسان کی مناسب جسمانی، روحانی اور ذہنی صحت کے لیے اچھا مطالعہ، ورزش، عبادات وغیرہ انتہائی ضروری ہیں. ہمیں اپنے مشینی شیڈول سے ان تین کاموں کے لیے باقاعدہ وقت نکالنا ہوگا. اپنے آپ کو توجہ دینی ہوگی کیونکہ جسمانی، روحانی اور ذہنی طور پر اچھی صحت کا براہ راست اثر آپ کے کام، آپ کے تعلقات وغیرہ پر پڑتا ہے.
محمد عبداللہ