میرپورخاص:چہلم حضرت امام حسین عقیدت و احترام سے منایا گیا

میرپورخاص،باغی ٹی وی( نامہ نگار سید شاہزیب شاہ کی رپور ٹ )جس طرح پاکستان بھر میں نواسہء رسول سیدنا امام حسین رضی اللہ عنہ کا چہلم انتہائی عقیدت و احترام کے ساتھ منایا گیا، اسی طرح میرپورخاص سٹیلائٹ ٹاؤن میں بھی حیدری امام بارگاہ سے ایک بڑا علم ، تعزیہ اور ذوالجناح کا جلوس انجمن حسین مظلوم کی جانب سے سید ظہیرالحسن نجمی ، سید اعجاز حسین رضوی ، سید سجاد حسین رضوی(پپا) سید امیر حسین نقوی(بھولے بھائی) سید خورشید زیدی اور دیگر کی قیادت میں نکالا گیا ۔۔ جلوس کے شرکاء تمام راستے نوحہءخوانی اور سینہ کوبی کرتے رہے

کسی بھی ناخوشگوار واقعے سے نمٹنے کے لئے جلوس کے اطراف رینجرز اور پولیس کی جانب سے سیکیورٹی کا سخت حفاظتی حصار قائم کیا ہوا تھا،جبکہ یونین کونسل 4 کے چیئرمین حاجی فاروق ملک کی ہدایت پر جنرل کونسلر لیاقت علی شاہ ندیم خان اور ارشاد ملک نے جلوس کا استقبال کیا

ریسکیو 1122 کی ایمبولینس جلوس کے ساتھ رواں دواں تھی ، جبکہ محمد میڈیکل کالج کی فرسٹ ایڈ دینے والی ٹیم بھی جلوس کے ہمراہ تھی،جلوس کے راستوں میں کئی جگہوں پر سبیلیں لگائی گئی تھیں اور کئی جگہوں پر گل پاشی بھی کی گئی جبکہ سٹیلائٹ ٹاؤن کے مرکزی چوراہے پر جلوس کے شرکاء نے زنجیر زنی اور چھریوں کا ماتم بھی کیا گیا ، اس موقع پر علماء اور ذاکرین نے افکار امام حسین پر روشنی ڈالی، اسطرح جلوس اپنے مقررہ راستوں سے ہوتا ہوا دوبارہ حیدری امام بارگاہ پہنچ کر اختتام پذیر ہوگیا