احسن اقبال کے خلاف بیان بازی پر دانیال عزیز کو شوکاز نوٹس جاری

اسلام آباد: سابق وفاقی وزیر اور ن لیگ کے سینئیر رہنما احسن اقبال کے خلاف بیان بازی پر ن لیگ نے دانیال عزیز کو شوکازنوٹس جاری کردیا۔

باغی ٹی وی:نوٹس ن لیگ پنجاب کے صدر رانا ثنا اللہ کی جانب سے جاری کیا گیا ،نوٹس میں دانیال عزیز کو سات روز کے اندر اپنے بیان سےمتعلق پارٹی کو جواب دینے کی ہدایت دی گئی نوٹس میں کہا گیا کہ آپ کی جانب سے بیان میں پارٹی ڈسپلن کی خلاف ورزی کی گئی ،آپ کے بیان کی وجہ سے پارٹی کی ساکھ متاثر ہوئی ہے ،پاکستان مسلم لیگ ( ن ) کا آئین اس بات کا تقاضہ کرتا ہے کہ ہر رکن پارٹی کے ڈسپلن کی پابندی کرے-

دانیال عزیز کو جاری نوٹس میں کہا گیا کہ آپ کا مورخہ 30 نومبر 2023ءکا میڈیا پربیان پارٹی ڈسپلن اور پالیسی کی خلاف ورزی اور حقائق کے برخلاف ہے،ہررکن کا فرض ہے کہ اگر اسے کوئی شکایت ہے تو وہ پارٹی قیادت اور متعلقہ فورم کواپنی شکایت پیش کرے ،آپ سے تقاضا ہے کہ آپ پارٹی ڈسپلن کی پابندی کر یں اور ایسے بیانات سے مکمل اجتناب کریں۔

واضح رہے کہ رہنما مسلم لیگ ن دانیال عزیز نے اپنی ہی پارٹی کے سیکرٹری جنرل احسن اقبال کو تنقید کا نشانہ بناتے ہوئے انہیں مہنگائی کا ذمہ دار قرار دے دیا تھا ایک بیان میں دانیال عزیز کا کہنا تھا کہ احسن اقبال بلدیاتی حکومتوں کے بارے میں خودکو عقل کُل سمجھتے ہیں، احسن اقبال کو مقامی حکومتوں سے متعلق تقریر جھاڑنے سے پہلے جواب دینا چاہیے کہ وہ جب (گزشتہ دور حکومت میں) پرائس مانیٹرنگ کمیٹی کے چیئرمین تھے تو ریکارڈ توڑ مہنگائی پر قابو کیوں نہ پاسکے، اس نااہلی کی وجہ سے ہماری حکومت عوامی سطح پر مکمل ناکام ہوگئی تھی، ہماری پارٹی مسلم لیگ ن مہنگائی کو کم رکھنے کا بہت اچھا ریکارڈ رکھتی تھی، لیکن مہنگائی کی وجہ سے ہماری پارٹی کی ساکھ کو شدید نقصان پہنچا۔

رہنما مسلم لیگ کا کہنا تھا کہ غریب عوام کو کمر توڑ مہنگائی کا سامنا کرنا پڑا جو احسن اقبال کی مکمل نا اہلی اور ناکامی تھی، پارٹی نے مہنگائی کا نوٹس لیا ہوتا تو ناکامی پر یقیناً احسن اقبال کو برطرف کر دیا جاتا، الیکشن سرپر ہیں اور پارٹی مہنگائی کا نوٹس نہ بھی لے تو عوام ہرحال میں لیں گے، اب وہ ووٹ کو جاری مہنگائی سے جوڑ رہے ہیں جس کے ذمہ دار احسن اقبال ہیں۔