راولپنڈی میں ڈینگی مچھر کے حملوں میں اضافہ ہوا ہے جس کے بعد ضلعی انتظامیہ نے 3 علاقوں کو ریڈ زون قرار دے دیا۔
ذرائع کے مطابق راولپنڈی میں ڈینگی مچھر کے حملوں پر قابو پانے کے لیے ضلعی انتظامیہ نے گرجا روڈ، چک جلادین اور ڈویری کو ڈینگی ریڈ زون قرار دے دیا۔ ضلعی انتظامیہ کا کہنا ہے کہ راولپنڈی کے ڈینگی ریڈ زون کے علاقوں میں متاثرہ مریضوں کی تعداد 60 تک پہنچ چکی ہے۔
انتظامیہ نے بتایا ہے کہ کمشنر راولپنڈی کے حکم پر موبائل لیبارٹریز متاثرہ علاقوں میں پہنچا دی گئی ہیں اور اسسٹنٹ کمشنر آفس کا کیمپ آفس بھی قائم کر دیا گیا ہے۔ محکمۂ صحت اور متعلقہ عملے کو بھی ریڈ زون میں پہنچنے اور انسدادِ ڈینگی کی کارروائیوں میں مزید تیزی لانے کی ہدایت کی گئی ہے۔
واضح رہے کہ صوبہ پنجاب میں گزشتہ 24 گھنٹوں کے دوران ڈینگی کے31 مریض رپورٹ ہوئے ہیں جن میں سے 18 مریضوں کا تعلق راولپنڈی، 12 کا لاہور اور 1 کا فیصل آباد سے ہے۔
یاد رہے کہ پنجاب میں گزشتہ 24 گھنٹوں کے دوران ڈینگی کے31 مریض رپورٹ ہوئے ہیں جن میں سے 18مریضوں کا تعلق راولپنڈی، 12 کا لاہور اور ایک کا فیصل آباد سے ہے۔ سیکریٹری صحت پنجاب کے مطابق: رواں سال پنجاب میں اب تک ڈینگی کے 665 مریض رپورٹ ہوچکے ہیں۔ لاہور سے ڈینگی کے کل 298 کیسز سامنے آئے ہیں، صوبے بھر کے اسپتالوں میں ڈینگی کے136مریض اس وقت زیرِ علاج ہیں۔ لاہور کے اسپتالوں میں 42 مریض زیرِ علاج ہیں۔
پاکستان میں ہر سال کئی افراد ڈینگی وائرس کا شکار ہوتے ہیں جو ڈینگی بخار کا سبب بنتا ہے۔ ڈینگی بخار بھورے رنگ کے مادہ ایڈیس مچھر کے کاٹنے سے ہوتا ہے۔ اِن مچھروں کی افزائش کھڑے پانی میں ہوتی ہے۔ ڈینگی وائرس کے شکار افراد کو ذیلی طبی بیماری (یعنی جب انفیکشن کے شکار افراد کو علامات ظاہر نہ ہوں) سے لئے کر شدید علامات ہو سکتی ہیں۔ گرم موسم اور ہوا میں نمی کے دوران ڈینگی وائرس کے پھیلاوٴ کا خطرہ بڑھ جاتا ہے۔ عالمی ادارہ صحت (ڈبلیو ایچ او) کے مطابق ہر سال 100 سے زیادہ ممالک میں 400-100 ملین (40-10 کروڑ) افراد ڈینگی وائرس کا شکار ہوتے ہیں۔
پاکستان موسم، آبادی کی کثافت اور دیگر مختلف عوامل کی وجہ سے ڈینگی وائرس کے پھیلاؤ کے خطرے سے ہر سال دو چار رہتا ہے۔ یہی وجہ ہے کہ حکومتِ پاکستان نے ایڈیس مچھروں کی موسمی افزائش کو روکنے کے لئے مختلف اقدامات کئے ہیں۔ تاہم اِس وائرس سے بچاؤ کو یقینی بنانے کے لئے احتیاطی تدابیر پر عمل کرنا ہم سب کے لئے ضروری ہے۔
