ڈپٹی اسپیکر قومی اسمبلی کی روجھان جمالی آمد،سابق وزیر اعظم کے اہلخانہ سے اظہار تعزیت

ڈپٹی اسپیکر قومی اسمبلی قاسم خان سوری کی روجھان جمالی آمد، ‏سابق وزیراعظم سینیئر سیاستدان اور پی ٹی آئی رہنماء میر ظفر اللہ خان جمالی مرحوم کے اہلخانہ سے تعزیت و فاتحہ خوانی کی انھوں نے مرحوم کی مغفرت، بلند درجات اور پسماندگان کے لیے صبرِ جمیل کی دعا کی۔

سابق وزیراعظم کے اہلخانہ سے گفتگو کرتے ہوئے ڈپٹی اسپیکر قومی اسمبلی نے کہا کہ وہ میر ظفر اللہ خان جمالی کی وفات پر افسردہ ہیں، جمالی صاحب کی پہچان ایک سنجیدہ اور منجھے ہوئے سیاست دان کی رہی، وہ روایات کے پابند تھے جن میں دوستی اور تعلقات نبھانا اور دوسروں کو ساتھ لے کر چلنا شامل تھا اللہ تعالیٰ میر صاحب کی مغفرت فرمائے۔

ڈپٹی اسپیکر قومی اسمبلی کے ہمراہ پاکستان تحریکِ انصاف بلوچستان کے سینیئر رہنماء ڈاکٹر منیر بلوچ، سردار خادم حسین وردگ باری، لیاقت لہڑی، داؤد پانیزئی، گودا خان، حاجی گل خان اچکزئی، اکرم ترین، باچا آغا اور دیگر شامل تھے۔