سن 90 کی دہائی کے مقبول ترین ڈرامہ سیریل ’دھواں‘ کے کرداروں کی سوشل میڈیا پر وائرل ایک یادگار تصویر نے شائقین کے ذہنوں میں ڈرامے کی یادیں تازہ کردیں۔
باغی ٹی وی : سجاد احمد کی ہدایت کاری میں 1994 میں پی ٹی وی پر نشر ہونے والا ڈرامہ سیریل ’ دھواں ‘ ڈراموں کی تاریخ کا وہ بہترین تخلیق ہے جسے لوگ آج بھی دیکھنا پسند کرتے ہیں اس ڈرامے کی مقبولیت کا اندازہ اس بات سے لگایا جاسکتا ہے کہ ڈرامے کے نشر ہونے کے دوران سڑکوں پر سناٹا چھا جاتا تھا اور ہر طرف لوگ ٹی وی کے آگے بیٹھے نظر آتے تھے۔
پی ٹی وی کی تاریخ میں اگر پہلے ایکشن ڈرامے کا اعزاز کسی کو حاصل ہے تو وہ ’ دھواں ‘ ہی ہے جو حب الوطنی کا اظہار بھی کرتا ہے۔
عاشر عظیم نے اس ڈرامے کو تحریر کیا اور انہوں نے ہی پولیس افسر اور ایک خفیہ ایجنٹ کا مرکزی کردار بھی کیا اور اُن کے ساتھ نوید، واجد، داؤد اور حمید بھی شامل ہوتے ہیں۔ اس ڈرامے میں سارہ، عظمیٰ اور سلمان جیسے کردار بھی تھے جنہوں نے اس ڈرامے کو شہرت کی بلندیوں پر پہنچانے میں اہم کردار ادا کیا-
عاشر عظیم فیس بُک اسکرین شاٹس
عاشر عظیم ،نبیل، نازلی نصر اور نیئر اعجاز کے کرداروں کو بھی آج تک یاد کیا جاتا ہے-
سجاد احمد کی ہدایات میں بننے والے اس ڈرامے میں پاکستانی معاشرے میں جرائم پیشہ عناصر کی سرگرمیوں اور پولیس کی کمزوریوں کی بہت خوبصورتی سے عکاسی کی گئی تھی جن سے نمٹنے کا بیڑہ چند نوجوان اٹھاتے ہیں جن کی دوستی بھی دیکھنے والوں کے ذہن کو متاثر کرتی ہے اس ڈرامے کا المیہ اختتام بھی انتہائی پُر اثر ثابت ہوا اور آج بھی اسے کلاسیک سمجھا جاتا ہے۔
عاشر عظیم کے لکھے اس ڈرامے کو لوگ آج بھی دیکھنا پسند کرتے ہیں حتیٰ کہ نہ صرف ڈرامہ بلکہ اس کے کرداروں کو ایک بار پھر سے دیکھنا چاہتے ہیں لیکن حقیقی طور پر سب کرداروں کو ایک ساتھ دیکھنا ممکن تو نہیں لیکن ان سب کی ایک یادگار تصویر سوشل میڈیا پر زیر گردش ہے۔
عاشر عظیم کے فیس بک پیچ پر ایک تصویر شیئر کی گئی جس میں داؤد (نبیل) کے علاوہ تمام مرکزی کردار موجود ہیں۔ نہ صرف مرکزی کردار بلکہ ڈرامے میں ولن (بزنس مین) کا کردار ادا کرنے والے نیئر اعجاز بھی موجود ہیں۔ اُن کے ہمراہ دیگر کردار بھی ہیں جوکہ عاشر عظیم کی ٹیم کے خلاف پیش پیش رہے-
مذکورہ تصویر نے شائقین کو ایک بار پھر ماضی کی یاد دلا دی سب نے اس تصویر کو دیکھنے کے بعد اس ڈرامہ کو پاکستان ٹیلی ویژن کی تاریخ کا بہترین ڈرامہ قرار دیا۔
عاشر عظیم فیس بُک اسکرین شاٹس
