اسلام آباد:حضرت ابراہیم اور حضرت اسمٰعیل علیہ السلام کی عظیم قربانی کی یاد میں عید الاضحی اتوار کو مذہبی جوش و جذبے سے منائی جائے گی۔
دِن کا آغاز مساجد میں ملک کی ترقی و خوشحالی اور سلامتی کے لئے خصوصی دعائوں سے ہو گا۔ نمازِ عید تمام بڑے شہروں اورقصبوں کی مساجد اور عید گاہوں میں ادا کی جائے گی۔
علماء کرام عید کے خطبوں میں حضرت ابراہیم اور حضرت اسمٰعیل علیہ السلام کی عظیم قربانی کے فلسفے پر روشنی ڈالیں گے ۔ سنت ابراہیمی کی پیروی میں لوگ جانوروں کی قربانی کریں گے۔
دوسری طرفوزیراعظم محمد شہبا ز شریف نے حکام کو ہدایت کی ہے کہ وہ عید کے دنوں میں صفائی کی مشینری کو شفٹوں میں 24گھنٹے فعال رکھیں اور عوام کی دہلیز سے آلائشیں اٹھانے کے عمل کو یقینی بنائیں،مون سون کی بارشوں کے پیش نظر نالوں کی صفائی کی جائے، عید الاضحیٰ کے دنوں میں مری میں سیاحوں کی آمد پر ٹریفک کی روانی یقینی بنانے کے لئے مناسب حکمت عملی ترتیب دی جائے ۔
وزیراعظم محمد شہباز شریف کی زیر صدارت عید الاضحیٰ کے حوالے سے عوام کی سہولت کے لئے اقدامات اور عید کے دنوں میں صفائی کے نظام کے حوالے سے اعلیٰ سطحی اجلاس منعقد ہوا۔ اجلاس میں خواجہ سلمان رفیق، خواجہ عمران نذیر، چیف سیکرٹری پنجاب، ایڈیشنل چیف سیکرٹری پنجاب، آئی جی پنجاب پولیس، کمشنر لاہور ڈویژن، ڈپٹی کمشنر لاہور، سیکرٹری سیاحت پنجاب، سیکرٹری ہاؤسنگ پنجاب ، سیکرٹری صحت پنجاب،چیئرمین اور ایم ڈی لاہور ویسٹ مینجمنٹ کمپنی ، صوبائی و ضلعی انتظامیہ لاہور کے افسران اور پنجاب پولیس کے دیگر سینئر افسران جبکہ چیئرمین نیشنل ہائی وے اتھارٹی اور کمشنر راولپنڈی ڈویژن نے ویڈیو لنک کے ذریعے اجلاس میں شرکت کی۔ اجلاس میں وزیراعظم کو پنجاب میں عید الاضحیٰ کے دوران صفائی کے انتظامات کے حوالے سے بریفنگ دی گئی۔
وزیراعظم نے حکام کو ہدایت کی کہ وہ عید کے دنوں میں صفائی کی مشینری کو شفٹوں میں 24گھنٹے فعال رکھیں اور عوام کی دہلیز سے آلائشیں اٹھانے کے عمل کو یقینی بنائیں۔وزیراعظم نے واسا حکام کو سخت ہدایت جاری کی کہ مون سون کی بارشوں کے پیش نظر نالوں کی صفائی کی جائے۔ وزیراعظم نے ہدایت کی کہ عید الاضحیٰ کے دنوں میں مری میں سیاحوں کی آمد پر ٹریفک کی روانی یقینی بنانے کے لئے مناسب حکمت عملی ترتیب دی جائے۔ انہوں مزید ہدایت کی کہ عید کی چھٹیوں میں بہارہ کہو سے مری تک فیملیز کے لئے فری شٹل سروس چلائی جائے۔
وزیراعظم نے حکام کو غیر قانونی مویشی منڈیوں کی روک تھام کے لئے مناسب حکمت عملی بنانے کی ہدایت کی اور کہا کہ مویشی منڈیوں تک عوام کی سہولت کے لئے شٹل سروس کو یقینی بنایا جائے ۔ مزید برآں وزیراعظم نے ہدایت کی کہ عید کی چھٹیوں میں دفعہ 144 کے نفاذ کو یقینی بنایا جائے۔ وزیراعظم نے ہدایت کی کہ عید کے بعد محکموں کی کارکردگی سے متعلق تفصیلی رپورٹ پیش کی جائے ،جس محکمے کی کارکردگی تسلی بخش نہیں ہوئی اس کی سرزنش کی جائے گی۔
انہوں پاکستانیوں سمیت تمام امت مسلمہ کو عیدالاضحٰی کی مبارک اور نیک تمناؤں کا اظہار کرتے ہوئے کہا ہے کہ آللہ تعالیٰ نے اپنے خلیل حضرت ابراہیم (ع) اور ان کے عظیم فرزند حضرت اسماعیل(ع) کی فرمانبرداری کو انتہائی پسند فرماتے ہوئے قربانی کی عظیم روایت بنا دی، قربانی کا اصل مفہوم اللہ رب العزت کی اطاعت و فرمانبرداری ہے، اللہ تعالیٰ اپنے اطاعت گزار بندوں کی نیت دیکھتا ہے اور اسی کی بنیاد پر اجر عطا فرماتا ہے، حضرت ابراہیم (ع) اور ان کے عظیم فرزند حضرت اسماعیل(ع) کی سیرت پاک کی پیروی میں ہی ہم سب کی نجات ہے۔
اُن کا کہنا تھا کہ یتیموں، بیوائوں، بے کسوں اور ناداروں کی مدد کرکے ہم اس عظیم دن کا حق ادا کر سکتے ہیں عیدالاضحیٰ کے موقعے پر مشکلات و مصائب کے شکار بھائیوں بہنوں کی مدد پر خصوصی توجہ دی جائے مہنگائی کی عالمی لہر کے اثرات کی وجہ سے اپنے ارد گرد موجود ضرورت مندوں اور سفید پوشوں کو عید کی خوشیوں میں شریک کریں۔
وزیراعظم نے کہا کہ سیلاب اور بارشوں سے متاثرہ افراد کو نہ بھولیں، ان کی بھرپور مدد کریں، مشکل کی اس گھڑی میں ان کی غم گساری ہمارا فرض ہے، نوجوان نسل عید قربان کے اصل مفہوم سے بہت کچھ سیکھ سکتی ہے، نوجوان معاشرے میں تحمل، برداشت، ایثار وقربانی کی عملی مثال بنیں، معاشرے میں اپنے اخلاق و اقدار سے حقیقی تبدیلی لائیں، عیدالاضحیٰ کے موقعے پر عوام سے کورونا وبا کے پیش نظر احتیاطی تدابیر پر سختی سے عملدرآمد کرنے کی اپیل کرتا ہوں، آلائیشوں کو بروقت ٹھکانے لگانے اور صفائی ستھرائی کے لئے ضلعی انتظامیہ اور متعلقہ ادارے مستعدی سے فرائض انجام دیں۔