خانیوال:سی ٹی ڈی اور دہشتگردوں کے درمیان فائرنگ کا تبادلہ، انتہائی مطلوب دہشتگرد ہلاک

لاہور:خانیوال میں سی ٹی ڈی اور دہشتگردوں کے درمیان فائرنگ کا تبادلہ ہوا ہے، انتہائی مطلوب دہشتگرد عرفان اللہ کو ہلاک کردیا، عرفان اللہ راولپنڈی میں کار دھماکے کا ماسٹرمائنڈ تھا۔

پولیس کے مطابق خانیوال میں سی ٹی ڈی اور دہشتگردوں میں فائرنگ کا تبادلہ ہوا ہے، سی ٹی ڈی نے انتہائی مطلوب دہشتگرد عرفان اللہ کو ہلاک کردیا ہے، عرفان اللہ راولپنڈی میں کار دھماکے کا ماسٹرمائنڈ تھا۔ ہلاک دہشتگرد سے کلاشنکوف ، دستی بم اور دیگر سامان برآمد ہوا ہے۔

خانیوال میں سی ٹی ڈی اور دہشتگردوں کے درمیان 20 منٹ تک فائرنگ کا تبادلہ ہوا۔سی ٹی ڈی کا کہنا ہے کہ مفرور 2 سے 3دہشتگردوں کی تلاش جاری ہے۔

اس سے پہلے یہ بھی اطلاعات تھیں کہ کاؤنٹر ٹیررازم ڈیپارٹمنٹ ( سی ٹی ڈی) نے پنجاب میں پنجاب بھر انٹیلی جنس بیسڈ آپریشن کے دوران 9 مبینہ دہشت گردوں کو گرفتار کرلیا ہے۔

سی ٹی ڈی حکام کے مطابق دہشت گردوں کو لاہور سمیت گوجرانوالہ، ڈیرہ غازی خان اور بہاولپور سے گرفتار کیا گیا۔ گرفتار دہشت گردوں کا تعلق کالعدم ٹی ٹی پی اور القاعدہ سے ہے۔حکام کے مطابق دہشت گردوں میں عبدالرحمان، روید خان، غلام اللہ، احمد حسن، جلیل احمد، امداد اللہ، باسط علی، جنید علی شامل ہیں۔

حکام نے مزید بتایا کہ دہشت گردوں سے خودکش جیکٹ بنانے کا سامان، ہینڈ گرنیڈ اور دیگر بھاری اسلحہ برآمد کیا گیا ہے۔ دہشت گرد حساس اضلاع میں دہشت گردی کا منصوبہ بنا رہے تھے۔گرفتار دہشتگردوں کے خلاف 7 مقدمات درج کرکے تفتیش شروع کردی گئی ہے۔

سی ٹی ڈی حکام نے مزید کہا کہ انٹیلی جنس بیسڈ آپریشنز میں 20 مشتبہ افراد سے تفتیش کی گئی ، رواں ہفتے سی ٹی ڈی نے 476 کومبنگ آپریشنز کے دوران 91 مشتبہ افراد کو حراست میں لیا ہے جب کہ مشتبہ افراد کے خلاف 67 مقدمات درج کیے گئے ہیں۔