معروف بھارتی فلمسازاور ہدایتکار رامانند ساگر کا یوم پیدائش

ہندوستانی فلم انڈسٹری کے معروف فلمساز، ہدایت کار اور کہانی نویس۔ رامانند ساگر 29 دسمبر 1917ء میں پیدا ہوئے انھیں ہندستانی ٹی وی کی مشہور اساطیری سیریل رامائن کی تخلیق پر بہت شہرت حاصل ہوئی تھی رامانند ساگر نے اپنے کیرئر کا آغاز بطور فلم ٹیکنیشن کیا تھا اور ممبئی کی فلم نگری میں ترقی کرتے کرتے وہ ایک کہنہ مشق فلمساز بن گئے تھے۔

رامانند نے پچیس سے زیادہ فلمیں اور ایک درجن سے زیادہ ٹی وی ڈرامے بنائے۔ ان کی چند یادگار فلموں میںانسانیت، کوہ نور، پیغام، گھونگھٹ، زندگی، آنکھیں، للکار، آرزو، گیت اور بغاوت کے نام آتے ہیں۔ انہوں نے ساگر جی کے ساتھ فلم سلمیٰ میں کام کیا جس میں ہیروئین پاکستانی اداکارہ سلمیٰ آغا اور ہیرو راج ببر تھے۔ اس فلم کے نغمے حسن کمال نے ہی لکھے تھے۔

ساگر کو اردو زبان سے بہت لگا تھا۔وہ ایک اچھے ناول نگار اور افسانہ نگار بھی تھے۔ برصغیر کی تقسیم پر بھی رامانند ساگر نے ایک ناول ”اور انسان مرگیا“ لکھا۔ اس کے علاوہ ان کے کئی افسانے اردو کے رسائل اور جرائد میں شائع ہو چکے ہیں۔ 12 دسمبر 2005ء کو ممبئی میں طویل علالت کے بعد ان کا انتقال ہوا۔