حکومت نے ناچ گانے ،آتش بازی ودیگرمضرصحت ومضرمعاشرہ تفریحات پرپابندی لگادی

لاہور: ڈسٹرکٹ گورنمنٹ لاہور نے ناچ گانے ،آتش بازی ودیگرمضرصحت ومضرمعاشرہ تفریحات پرپابندی لگادی ،اطلاعات کے مطابق پنجاب حکومت کی طرف سے جاری رپورٹ میں کہا گیا ہے کہ لاہور کی ضلعی انتظامیہ نے منگل کے روز نئے سال کے موقع پر عوامی محافل موسیقی، آتش بازی، ہوائی فائرنگ اور جشن کی دیگر تقریبات پر پابندی عائد کر دی ہے۔

تفصیلات کے مطابق صوبائی دارالحکومت میں سموگ کی بگڑتی ہوئی صورتحال کے پیش نظر ضلعی انتظامیہ نے آتش بازی پر پابندی عائد کردی۔ حکومت نے نئے سال کے موقع پر میگا سٹی میں آتش بازی کی نمائش کی اجازت طلب کرنے والی تمام درخواستوں کو بھی مسترد کر دیا۔

دریں اثنا، سیکورٹی وجوہات اور Omicron Covid کے مختلف کیسز کی وجہ سے ضلعی انتظامیہ کی جانب سے عوامی محافل اور دیگر تقریبات پر پابندی لگا دی گئی تھی

ادھر آج صوبہ سندھ کے دارالحکومت کراچی میں سال نو کے موقع پر سخت سیکیورٹی اقدامات کیے گئے ہیں، سی ویو جانے والے راستے پر اہلکار تعینات ہوں گے جبکہ بغیر سائلنسر والی کسی موٹر سائیکل کو نہیں چھوڑا جائے گا۔

تفصیلات کے مطابق سال نو کے موقع پر ڈسٹرکٹ ساؤتھ میں سخت سیکیورٹی اقدامات کیے گئے ہیں، ایس ایس پی ساؤتھ زبیر نذیر کا کہنا ہے کہ مجموعی طور پر 2 ہزار 250 اہلکار تعینات کیے جائیں گے، مختلف راستوں پر 1 ہزار 557 افسران و اہلکار ڈیوٹی انجام دیں گے۔

ایس ایس پی کا کہنا ہے کہ ہوائی فائرنگ کرنے والوں کے خلاف سخت کارروائی کی جائے گی، اقدام قتل سمیت دیگر دفعات کے تحت مقدمہ درج کیا جائے گا۔انہوں نے کہا کہ ڈسٹرکٹ ساؤتھ میں 6 پولیس لائنز ہیں، کوئی پولیس اہلکار یا اس کا رشتہ دار فائرنگ نہ کرے، پولیس لائنز سے باقاعدہ سرٹیفکٹ لیے گئے ہیں، مختلف راستوں پر ناکے لگائے جائیں گے۔

ایس ایس پی کے مطابق حساس مقامات کی چھتوں پر پولیس اہلکار تعینات ہوں گے، سی ویو پر ایس ایس یو کے اہلکار بھی تعینات ہوں گے۔ تمام حساس مقامات پر نفری تعینات کی جائے گی۔ بغیر سائلنسر والی کسی موٹر سائیکل کو نہیں چھوڑا جائے گا۔

انہوں نے مزید کہا کہ پولیس سیکیورٹی کو مجموعی طور پر 9 سیکٹرز پر بنایا گیا ہے، ایف ٹی سی سے دو دریا، 3 تلوار سے اختر کالونی کالا پل تک 11 افسران موجود ہوں گے۔