پولیس کی کارکردگی بہتر کرنے کے لیے آئی جی پنجاب نے نیا میکنزم دے دیا

لاہور:پولیس کی کارکردگی بہتر کرنے کے لیے آئی جی پنجاب نے نیا میکنزم دے دیا،اطلاعات کےمطابق آئی جی پنجاب راؤ سردار علی خان نے آپریشنز پولیس کی کارکردگی جانچنے کیلئے جدید میکانزم واضح کردیا۔

باغی ٹی وی ذرائع کے مطابق آئی جی پنجاب نے اٹھارہ پوائنٹس پر مبنی احکامات اور تفصیلی پرفارمے آر پی اوز اور ڈی پی اوز کو بھجوا دئیے۔ان پوائنٹس کی بنیاد پر ریجنز اور اضلاع میں آپریشنز ٹیموں کی کارکردگی کو جانچا جائے گا۔

ذرائع کے مطابق آئی جی پنجاب کاکہنا تھا کہ شہریوں کے مسائل کا بروقت حل اور انکی جان و مال اور عزت کا تحفظ میری اولین ترجیح ہے۔جو افسریا اہلکار شہریوں کیلئے تکلیف یا پریشانی کا باعث بنا وہ نہ صرف میری ٹیم بلکہ محکمہ پولیس کا حصہ بھی نہیں رہے گا۔

آئی جی پنجاب نے مزید کہا کہ رٹ آف اسٹیٹ برقرار رکھنے میں کسی بھی طرح کی غفلت یا کوتاہی قابل معافی نہیں ہوگی۔15پر موصول کالز پر فوری رسپانس یقینی بنانے کے ساتھ ساتھFIRکے بروقت اندراج کو یقینی بنایا جائے۔

آئی جی پنجاب نے مزید کہا کہ پرائم منسٹر پورٹل (پی ایم ڈی یو) پر آنے والی شکایات پربروقت اقدامات نہ کرنیوالے خود کو سخت محکمانہ کاروائی کیلئے تیار رکھیں۔ اسلحہ کی نمائش اور ہوائی فائرنگ کے مرتکب افرادکے خلاف ایکشن سے پہلوتہی کرنے والے خود کو سخت ترین کاروائی کیلئے تیار رکھیں۔

آئی جی پنجاب نے کہا کہ 1787پر موصول شہریوں کی شکایات کو مقررہ ٹائم لائن کے اندر حل نہ کرنے والے سپر وائزری افسرا خود کو کسی رعائیت کا مستحق نہ سمجھیں۔ کسی افسر یا اہلکار کو60دنوں سے زائد معطل ہرگز نہ رکھا جائے،سزا یا بحالی کا فیصلہ مقررہ وقت کے اندر ہونا چاہئیے۔

آئی جی پنجاب نے کہا کہ پتنگ و دھاتی ڈور کی تیاری، فروخت اور استعمال کنندگان کے خلاف کاروئیوں کو مزید فاسٹ ٹریک کیا جائے۔

آئی جی پنجاب کا کہنا تھا کہ پرانی دشمنیوں کے خاتمے اور ان میں مزید نقصان کی پیش بندی کیلئے موثر حکمت عملی نہ بنانے والوں کو جواب دہ ہونا ہوگا۔اشتہاری مجرمان اور عدالتی مفروران کو پابند سلاسل کرنے کیلئے سپر وائزری افسران اقدامات میں تیزی لائیں۔