بھارتی سپریم کورٹ نے اجودھیا کے فیصلے کے خلاف نظرثانی کی سبھی درخواستیں خارج کردیں

نئی دہلی : سپریم کورٹ آف انڈیا نے اجودھیا کے معاملے میں 9 نومبر کے فیصلے کے خلاف نظرثانی کی سبھی درخواستوں کو خارج کردیا ہے، درخواستوں کے خارج ہونے کے بعد مسلمانوں میں بہت زیادہ مایوسی پھیل گئی ہے اوربھارت سے یہ آوازیں اٹھنا شروع ہوگئی ہیں‌ کہ بھارتی عدالتیں انصاف نہیں بلکہ ہندوتوانظریے کی محافظ ہیں

سرکاری خبررساں ایجنسی یو این آئی نے خبردی ہے کہ سپریم کورٹ کے چیف جسٹس ایس اے بوبڈے کی سربراہی میں پانچ رکنی بینچ نے جمعرات کو اجودھیا تنازعے پر سپریم کورٹ کے فیصلے کے خلاف دائر کی گئی سبھی18 درخواستوں کو مسترد کردیا ہے –

نئی دہلی سے ذرائع کے مطابق ان سبھی عذرداریوں پر بینچ نے چیف جسٹس کی سربراہی میں چیمبر میں غور و خوض کیا – سپریم کورٹ کی ویب سائٹ میں کہا گیا ہے کہ سپریم کورٹ کے آئینی بینچ کے چیمبر میں کل اٹھارہ عذرداریوں پرغوروخوض کیا گیا اور پھر سبھی کو مسترد کردیا گیا –

یاد رہےکہ سپریم کورٹ کے 9 نومبر کے فیصلے میں متنازعہ مقام پر رام مندر کی تعمیر کرنے اور مسلم فریق کو اجودھیا میں دوسرے مقام پر مسجد بنانے کے لئے پانچ ایکڑ زمین مہیا کرنے کا حکومت کو حکم دیا تھا –