اس دیس کی ساری ماؤں کو ، اسلام سکھانا واجب ہے شاعری: فاخرہ تبسم

جس دیس کی مائیں بچوں کو

مغرب کے سبق سکھاتی ہوں

جس دیس کی مائیں بچوں کو

گانوں کی دُھن پہ سلاتی ہوں

جس دیس کی مائیں بچیوں کے

فحا شی کے نام پہ اترائیں

جس دیس کی مائیں مغرب کی

دلدل میں خود ہی گر جائیں

جس دیس کے چوراہوں پر

تصویریں ہو ں عریانی کی

وہاں زنا کی شرح بڑھ جائے

تو پھر بات ہے کیا حیرانی کی

جس دیس کے علماء بھی

باتوں کو خوب گھماتے ہوں

اور اپنی انا کی خاطر

نفرت کے بیج اگاتے ہوں

ووٹوں کے نام پہ لوگوں کی

عقلوں سے کھیلا جاتا ہو

شعور اُڑا کے ذہنوں کے

اس قوم کو بیچا جاتا ہو

جس دیس میں جوہر تربیت کے

ناپید ہو جائیں بچپن سے

جان چُھڑائیں گے پھر وہ

تہذیب کے ہر اک بندھن سے

جس دیس میں تربیت بچوں کی

نیٹ اور کیبل کرتے ہوں

اس دیس کے مستقبل کے معمار

پھر کیوں نہ آوارہ پھرتے ہوں

اس دیس میں قاتل میڈیا پر

آواز اٹھانا واجب ہے

اس دیس کے ہراک باسی پر

سوال اٹھانا واجب ہے

اس دیس کی ساری ماؤں کو

اسلام سکھانا واجب ہے

اس دیس کی مکتب گاہوں میں

قرآن پڑھانا واجب ہے

انسان بنانا واجب ہے

شعور جگانا واجب ہے

شاعری: فاخرہ تبسم