اسلام آباد میں دفعہ 144 نافذ کر دی گئی
اسلام آباد میں دفعہ 144 نافذ کر دی گئی
باغی ٹی وی :وفاقی دارالحکومت اسلام آباد میں پبلک مقامات پر ماسک پہننے کے لیے دفعہ 144 نافذ کر دی گئی ہے۔
اس ضمن میں جاری نوٹیفکیشن کے مطابق پبلک مقامات پر ماسک پہننے کیلئے دفعہ 144 دو ماہ کے لیے نافذ کی گئی ہے۔خیال رہے کہ نیشنل کمانڈ اینڈ آپریشن سینٹر نے آج پاکستان میں کورونا وائرس سے بچاؤ کیلئے ماسک پہننا لازمی قرار دے دیا ہے۔
اس سلسلے میں وفاقی وزیر اسد عمر کی زیر صدارت این سی او سی کا اجلاس ہوا جس میں کورونا کی دوسری لہرکے پیش نظرحکمت عملی پرتبادلہ خیال کیا گیا۔اجلاس میں وفاقی وزیرداخلہ، سیکریٹری صحت اور چاروں صوبوں کے نمائندے بذریعہ ویڈیو لنک شریک ہوئے۔
کورونا وائرس کا پھیلاؤ کم کرنے کیلئے فیصلہ کیا گیا کہ شہری گھروں سے باہر نکلتے وقت ماسک لازمی پہنیں۔ حکومتی اور نجی سیکٹرز کے دفاتر میں کام کرنے والوں کے لیے ماسک پہننا لازم ہوگا۔صوبائی حکومتوں کو ہدایت کی گئی ہے کہ بازاروں، شاپنگ مالز، پبلک ٹرانسپورٹ، ریسٹورنٹس میں ایس او پیز اور ماسک کو لازم قرار دیں۔
