کراچی سے ٹورنٹو جانے والی پرواز میں مسافر کو دل کا دورہ ڈرامہ نکلا

کراچی : قومی ایئرلائن کی پرواز میں مسافر کو دل کا دورہ پڑنے کے معاملے کی حقیقت سامنے آگئی ، جس میں کراچی سے ٹورنٹو جانے والی پرواز میں مسافر کو دل کا دورہ ڈرامہ نکلا ‘ پی آئی اے نے مسافر کو بلیک لسٹ کردیا ۔ اے ار وائی نیوز کے مطابق مسافر کو فوری ایمبولینس کے ذریعے اسپتال منتقل کیا گیا جہاں پر ڈاکٹروں کی جانب سے کیے گئے ٹیسٹوں کی رپورٹ میں مسافر کو دل کے دورے کے شواہد نہیں ملے ، جس کی ترجمان پی آئی اے نے بھی تصدیق کی اور بتایا کہ 32 سالہ مسافر مریض سید وصی کینیڈین شہریت کے حامل ہیں ، پی آئی اے نے مسافر کو بلیک لسٹ کردیا ہے۔
خیال رہے کہ گزشتہ روز کراچی سے پی آئی اے کے ٹورنٹو جانے والے طیارے میں مسافر کو دل کا دورہ پڑنے کے سبب فوری لینڈنگ سے قبل قومی ائرلائن کو سوا کروڑ روپے مالیت کا اضافی ایندھن فضا میں ضائع کرنا پڑا تھا کیوں کہ کراچی سے ٹورنٹو جانیوالی براہ راست پرواز میں سوار مسافر کو دل کا دورہ پڑنے کے سبب جہاز کو ایک گھنٹہ 36 منٹ کی پرواز کے بعد فوری طور پر کراچی واپس اتار لیا گیا، جس کے بعد مسافر کو ایئر پورٹ پر ابتدائی طبی امداد فراہم کی گئی۔
ایئر لائن ذرائع کے مطابق کراچی میں طیارے کو فوری لینڈنگ سے پہلے اپنا اضافی ایندھن پھینکنا پڑا ، بوئنگ 777 طیارے نے لینڈنگ سے قبل ایک لاکھ کلو ایندھن فضا میں پھینکا جس کی مالیت سوا کروڑ روپے ہے ، انسانی جان بچانے کیلئے طیارے کو قبل از وقت لینڈنگ کرنا پڑی ۔