کشمیر کی عوام کی منزل پاکستان ہے اور پاکستان ہی رہے گی، سردار مسعود خان کا عزم

اسپیکر قومی اسمبلی اسد قیصر نے آزاد جموں کشمیر کے صدر سردار مسعود خان کی پارلیمنٹ ہاؤس میں ملاقات کی ہے. ملاقات میں چیئر مین پارلیمانی برائے کشمیر شہریار آفریدی بھی موجود ہیں. ملاقات میں مقبوضہ کشمیر کی موجودہ صورت حال سمیت باہمی دلچسپی کے اہم امور پر تبادلہ خیال کیا گیا ہے.

سپیکر قومی اسمبلی نے کہا کہ کشمیر پاکستان کی شہہ رگ ہے اور پاکستان کبھی اس سے غافل نہیں ہو سکتا ہے، پاکستانی عوام اور حکومت کشمیری عوام اور کشمیر میں ہونے والے ظلم و بربریت کی شدید مذمت کرتے ہیں. انہوں نے کہا کہ کشمیری عوام کا بھارتی مظالم اور بربریت کے سامنے غیر متزلزل جذبہ حق خوداردیت کی دنیا میں مثال نہیں ملتی ہے، دنیا مقبوضہ کشمیر میں انسانی حقوق کی پامالیوں اور کشمیری عوام کے قتلِ عام کا نوٹس لے. اسد قیصر نے کہا کہ بھارت مسئلہ کشمیر سے توجہ ہٹانے کے لیے اوچھے ہتھکنڈے استعمال کر رہا ہے، مسئلہ کشمیر کے حل کے بغیر خطے میں امن کا قیام ممکن نہیں ہے.
انہوں نے کہا کہ مسئلہ کشمیر اقوام متحدہ کی قراردادوں کی روشنی میں حل کیا جائے، پاکستان کا پارلیمان کشمیری عوام کے حقِ خود ارادیت اور جدوجہد آزادی کی مکمل حمایت کرتا ہے.

اسد قیصر نے کہا کہ پاکستان کی پارلیمنٹ میں مسئلہ کشمیر کو عالمی سطح پر اُجاگر کرنے کے لیے بھرپور اقدامات اٹھائے گئے ہیں، قائمہ کمیٹیاں برائے انسانی حقوق، خارجہ امور اور کشمیر کمیٹی کو مسئلہ کشمیر کو عالمی سطح پر اُجاگر کرنے کے لیے ہدایات کی گئیں ہیں.

صدر آزاد کشمیر نے کہا کہ آزاد کشمیر کی عوام پوری طرح مقبوضہ وادی کی عوام کے ساتھ کھڑی ہے ، کشمیر کی عوام کی منزل پاکستان ہے اور پاکستان ہی رہے گی. انہوں نے کہا کہ کشمیری عوام کل بھی پاکستان کے ساتھ کھڑے تھے اور آج بھی پاکستان کے ساتھ کھڑے ہیں، بھارت اقوام متحدہ کی قرارداد کے مطابق مسئلہ کشمیر حل کرے اور وہاں پر جاری نہتے کشمیریوں پر ظلم و بربریت فوری بند کرے.

سردار مسعود خان نے کہا کہ ملک کی سالمیت اور بقا کے لیے پوری قوم متحد ہے اور ہر جارحیت کا بھرپور جواب دینے کی صلاحیت رکھتی ہے، موجودہ حکومت نے کشمیر میں بھارتی افواج کی طرف سے انسانی حقوق کی خلاف ورزیوں کو بھرپور انداز میں عالمی سطح پر اُجاگر کیا ہے.
انھوں نے کہا کہ پاکستان کی طرف سے مقبوضہ کشمیر کی عوام کے ساتھ اظہارِ یکجہتی اور مسئلہ کشمیر کے پُر امن حل کے لیے کاوشیں قابلِ ستائش ہیں، مقبوضہ کشمیر کی سنگین صورتحال پر عالمی پارلیمانوں نے بھرپور انداز میں آواز اُٹھائی ہے.

صدر آزاد کشمیر نے پارلیمانی سفارتکاری کے ذریعے مسئلہ کشمیر کو علاقائی و عالمی سطح پر اُجاگر کرنے پر اسپیکر قومی اسمبلی کو خراج تحسین پیش کیا ہے.