صوبے میں کوئی نوکری نہیں بکے گی ، وزیر اعلی بلوچستان

وزیر اعلٰی بلوچستان میر سرفراز بگٹی کی زیر صدارت بلوچستان صوبائی کابینہ کا پہلا اجلاس منعقد ہوا ، وزیر اعلٰی نے گڈ گورننس ، عوام اور صوبے کی بہتری کا ایجنڈا کابینہ اجلاس میں پیش کردیا، اجلاس سے خطاب کرتے ہوئے وزیر اعلٰی بلوچستان میر سرفراز بگٹی نے کہا کہ بلوچستان میں سب سے بڑا چیلنج گورننس کا ہے ، گورننس میں بہتری کے لئے ساٹھ کے قریب اصلاحات تجویز کی گئی ہیں، کابینہ سے مشاورت کے بعد اصلاحاتی عمل کو حتمی شکل دی جائے گی، وزیر اعلٰی میر سرفراز بگٹی نے کہا کہ بلوچستان کو بہتری کی راہ پر گامزن کرنے کے لئے کابینہ پر بھاری ذمہ داری عائد ہوتی ہے، انسرجی صرف فوج اور ریاست تک محدود نہیں، یہ ہم سب کی لڑائی ہے ، وزیر اعلٰی میر سرفراز بگٹی نے مزید کہا کہ بڑھتے ہوئے غیر ترقیاتی اخراجات پر قابو پانا ہوگا، عام آدمی کی بہتری کیلئے ہم سب نے مل کر کام کرنا ہے، اور اہداف طے کرکے اس پر بتدریج عمل درآمد کو یقینی بنائیں گے، وزیر اعلٰی بلوچستان نے خطاب کرتے ہوئے کہا کہ آنے والی نسلوں کے روشن مستقبل کے لئے نیک نیتی سے کام کریں گے،
مثبت سمت کا تعین کرکے صوبے میں اچھی طرز حکمرانی کی عملی مثال قائم کریں گے، وزیر اعلی نے سختی سے کہا کہ صوبے میں کوئی نوکری نہیں بکے گی ،
وزراء اپنے اپنے محکموں کے انچارج ہیں ، امور پر کڑی نظر رکھیں ، ہر محکمے کی کارکردگی کا جائزہ لینے کے لئے "کے پی آئی” بنائیں گے، وزیر اعلٰی بلوچستان نے مزید کہا کہ کارکردگی کا جائزہ لیکر مزید بہتری کیلئے اقدامات اٹھائے جائیں گے، میرٹ پر کوئی سمجھوتہ قابل قبول نہیں، اور ایکٹنگ چارج کی روایات ختم کرکے متعلقہ گریڈ کا افسر متعلقہ پوسٹ کے لئے تعینات کریں گے، بعد ازاں وزیراعلیٰ بلوچستان میر سرفراز بگٹی کی زیر صدارت صوبائی کابینہ کے پہلے تعارفی اجلاس میں نوشکی واقعہ کی مذمت کی ، صوبائی کابینہ نے بریفنگ دیتے ہوئے کہا کہ مارنے والے دہشت گرد اور شہید ہونے والے پاکستانی تھے
صوبائی کابینہ کا صوبے میں دہشت گردی اور بد امنی کے مختلف واقعات میں شہید ہونے والے افراد کے لیے فاتحہ خوانی کی ، اور صوبائی کابینہ نے صوبے میں سیلاب اور دیگر قدرتی آفات میں جاں بحق ہونے والے افراد کے لیے بھی فاتحہ خوانی کی ۔صوبائی کابینہ کے اجلاس میں تمام وزراء اور مشیران کا وزیر اعلٰی بلوچستان میر سرفراز بگٹی پر اعتماد کا اظہار، بلوچستان کی ترقی ،گڈ گورننس کے قیام کے لئے وزیر اعلٰی بلوچستان کے وژن کو آگے بڑھانے کا عزم ظاہر کیا.