لوٹ مار کی سیاست کرنے والوں کیلئے پاکستان کی زمین تنگ ہو چکی، وزیر اعلیٰ پنجاب
باغی ٹی وی : وزیراعلیٰ پنجاب سردار عثمان بزدارنے کہا ہے کہ لوٹ مار کی سیاست کرنے والوں کیلئے پاکستان کی زمین تنگ ہو چکی ۔ وزیراعظم عمران خان کی قیادت میں تحریک انصاف کی حکومت نے پہلی بار بڑے بڑے لوگوں کو احتساب کے کٹہرے میں کھڑا کیا ۔ماضی میں جن لوگوں پر کوئی ہاتھ نہیں ڈالتا تھا آج وہ قانون کی گرفت میں ہیں۔ وزیراعظم عمران خان نے کرپشن کے بتوں کو پاش پاش کیا ۔ایک بیان میں انہوں نے کہا کہ کرپٹ عناصر کا احتساب تحریک انصاف کا منشور ہے اور تحریک انصاف کی حکومت اپنے منشور سے ایک انچ بھی پیچھے نہیں ہٹے گی۔ لوٹ مار کا دور اب کبھی واپس نہیں آئے گا اور وزیراعظم عمران خان کی قیادت میں پاکستان اپنی اصل منزل پائے گا۔
انہوں نے کہا کہ اپوزیشن جماعتیں پاکستان کی ترقی روکنے کے درپے ہیں۔ اپوزیشن کی جانب سے بلاجواز احتجاج غیر جمہوری طرز عمل ہے ۔ پاکستان کو اندرونی اور بیرونی چیلنجز درپیش ہیں اور موجودہ نازک حالات میں افراتفری کی سیاست غیردانشمندانہ اور ملکی مفادات کے منافی ہے ۔ انہوں نے کہا کہ اپوزیشن جماعتیں انتشار پھیلا کر ذاتی ایجنڈے کی تکمیل چاہتی ہیں جبکہ عوام منفی سیاست کی بجائے ملک کو آگے بڑھتا ہوا دیکھنا چاہتے ہیں۔ عثمان بزدار نے کہا کہ اپوزیشن جماعتیں احتجاج کر سکتی ہیں نہ لانگ مارچ۔ بدقسمتی سے اپوزیشن نے ملکی مفاد کو پس پشت ڈال دیا ۔ حکومت مدت پوری کرے گی۔ علاوہ ازیں وزیراعلیٰ سے وزیر ا علیٰ آفس میں صوبائی وزیر لائیوسٹاک سردار حسنین بہادر دریشک اورسیکرٹری جنرل تحریک انصاف جنوبی پنجاب علی رضا دریشک نے ملاقات کی۔ عثمان بزدار نے کہا کہ بہاولپور اورملتان میں سول سیکرٹریٹ کے ماڈل کی منظوری دے دی ۔سول سیکرٹریٹ ساؤتھ پنجاب بہاولپور اورسول سیکرٹریٹ ساؤتھ پنجاب ملتان کو جدید ترین طرز پر تعمیر کیا جائے گا۔
انہوں نے کہا کہ جنوبی پنجاب کے عوام سے کیا گیا ہر وعدہ پورا کریں گے ۔وزیراعظم عمران خان کی قیادت میں جنوبی پنجاب میں پہلی بارپائیدار ترقی کانیا دورشروع ہوا ۔سابق دور میں جنوبی پنجاب کے فنڈزمن پسند ضلعوں پر خرچ کئے گئے ۔سابق حکمران جنوبی پنجاب صوبے کے نام پر اپنی سیاست چمکاتے رہے ۔ہم جنوبی پنجاب کے عوام کو ان کا حق دے رہے ہیں۔ادھر عثمان بزدارنے اساتذہ کے عالمی دن کے موقع پر اپنے پیغام میں کہا ہے کہ ورلڈ ٹیچرز ڈے منانے کا مقصد اساتذہ کی اہمیت اور احترام کو اجاگر کرنا ہے ۔
طالب علم کی سوچ اور فکر کی راہ متعین کرنے میں استاد کا کردار نہایت اہمیت کا حامل ہے ۔ اساتذہ کی عزت و تکریم کی بدولت ہی طالب علم معاشرے میں عزت و شہرت کی بلندی تک پہنچ سکتا ہے ۔ میں اپنے اور پورے ملک کے اساتذہ کو عزت و احترام سے سلام پیش کرتا ہوں۔میں آج جس مقام پر ہوں، اس میں میرے اساتذہ کا بہت بڑا کردار ہے ۔ آج کے دن ہمیں اس عزم کا اعادہ کرنا ہے کہ استاد کی عزت و تکریم کو ہر صورت یقینی بنایا جائے گا
