ڈی آئی جی پی ویسٹ زون آفس میں اہم اجلاس طلب کیا گیا-
باغی ٹی وی : ڈی آئی جی ویسٹ زون کراچی ناصر آفتاب نے آج اپنے دفتر میں ویسٹ زون پولیس افسران کا اہم اجلاس طلب کیا جس میں ایس ایس پی سینٹرل, ایس ایس پی ویسٹ ایس پیز نیوکراچی, اورنگی ٹاؤن ایس ڈی پی اوز اور ایس ایچ اوز ویسٹ زون نے شرکت کی۔
ناصر آفتاب ڈی آئی جی ویسٹ زون نے کہا کہ منشیات فروشوں کے خلاف بھرپور کارروائی کرنی ہے کیونکہ منشیات تمام جرائم کی جڑ ہے اور اگر اسی کو ختم کردیا جائے تو اسٹریٹ کرائملز میں خودبخود کمی آجائے گی لہذا ویسٹ زون میں منشیات فروشوں کے خلاف بھرپور کارروائیاں کی جائیں لسٹڈ اور نان لسٹڈ منشیات فروشوں کو گرفتار کیا جائے۔
ڈی آئی جی ویسٹ زون ناصر آفتاب نے کہا کہ جو ایس ایچ او منشیات فروشوں اور ڈیلروں کے خلاف قابل ذکر کارروائی نہیں کرے گا اس کے خلاف محکمہ جاتی کارروائی کی جائے گی۔
پشاور دھماکہ،دہشتگردوں کا پورا نیٹ ورک ہمارے ریڈار پرآ چکا ہے،اہم شخصیت کا دعویٰ
ناصر آفتاب ڈی آئی جی ویسٹ زون نے اس موقع پر مزید کہا کہ ملک میں دہشت گردی کی واقعات ہورہے ہیں خاص کر فرقہ وارانہ دہشت گردی جس کا حالیہ ہدف پشاور شہر بنا ہے لہذا اس طرح کی دہشت گردی سے نمٹنے کے لیئے مذہبی مقامات خاص کر مساجد, امام بارگاہوں کی سیکیورٹی بڑھائی جائے اور ایک جامع سیکیورٹی پلان کے تحت پولیس ملازمان تعینات کیئے جائیں پیٹرولنگ کے دوران خاص طور پر مذہبی مقامات پر رکا جائے اور سینئر افسران سیکیورٹی چیک کریں۔
واضح رہے کہ اسٹریٹ کرائمز کی وارداتوں پر قابو پانے کے لیے اسپیشل سیکیورٹی یونٹ کے کمانڈوز کی تعیناتی کے باوجود کراچی میں جرائم کی وارداتوں کا جن کسی بھی صورت قابو میں آنے کا نام ہی نہیں لے رہا۔
پولیس کی جانب سے روزانہ کی بنیاد پر مبینہ پولیس مقابلوں میں زخمی سمیت دیگر ڈاکوؤں کی گرفتاری کے دعوے تو ضرور کیے جا رہے ہیں لیکن اسٹریٹ کرمنلز جب اور جہاں چاہیں اپنے ہدف کو نشانہ بنا کر فرار ہو جاتے ہیں۔